Sanhgyangh Dungcuz Swciyen daj bi 2003 banh gaiq daih’it Cungguek （Liujcouh·Sanhgyangh） Ciet Dohyeh Dungcuz gvaqdaeuj, moix bi ngoenzciet cungj youq gak aen gingjgih banh vaiz doxdaemj doxdax、boq venz doxdax、daem ceizet、doz mae daemj baengz、gwn ngaiz bak ranz doenghgij hozdung daegsaek Dungcuz naekgywggywg neix, lij ngoenzngoenz yienj cit heiq hung saedgingj fungcingz Dungcuz《Naenghhwnz》neix dem, aeu vwnzva minzcuz naekgywg、hozdung hoenghhwd angqyangz yinx ciencien fanhfanh boux hekyouz ndaw guek rog guek bae doxcaemh gvaq ciet, baenz aen binjbaiz lijyouz daegsaek yienhda ranghdieg Liujcouh、Gveilinz, caemhcaiq gonqlaeng aeundaej “Cungguek cib daih binjbaiz cietgingq”、cietgingq saujsu minzcuz daegbied ciengj、Cungguek cib daih cietgingq ceiq miz daegsaek minzcuz ciengj doenghgij cwnghauh najrongh neix.

“Dohyeh” dwg daj yaem Vah- dung hoiz gvaqdaeuj, eiqsei dwg “riengz sing go diuq foux”, dwg Dungcuz guek raeuz gij ciengq go eu fwen conzdungj ndawde cungj ndeu, aeu “angqyangz、doxndei、andingh、doxgiet” guh cawjdaez. Banh ciet gvaqdaeuj, aen yienh neix ciuq gij naemjfap “banh ciet guh moiz、doigawj guhcawj、saed vih yinx hek、bangcoengh fazcanj” bae banh, cimhra ok aen banjdaeuz banh ciet “cwngfuj dap daiz, giyez yienj heiq, ciuq hawciengz bae guh” neix, doenggvaq gij fuengsik daengxaen doigawj、baij yiengh siugai、doxyaeng gaicawx、ndaem gai doxciep neix, dap siugai bingzdaiz, ra roen moq siugai, haenqrengz senhconz caeuq doigawj siugai gij vwnzva Dungcuz、mbawcaz Sanhgyangh、youzcaz dangdieg、gij veh nungzminz、yienghvunq ranzcaep Dungcuz ndaw yienh, hawj ndaw yienh saedyienh le dajndaem dajciengx cauhguh caeuq siugai cungj hoenghvuengh, vunzlai souhaeuj ndaej demlai.

Cietdohyeh hozdung neiyungz lai cungj lai yiengh, gig miz daegsaek minzcuz, gij hozdung de aeu Dungcai hung yienhsingz guh cungsim, ietlienz daengz Gvanhdung Gingjgih、Cwngzyangz Gingjgih、Bahdonz Gingjgih、Danhcouh Gingj- gih、Laujbauj Sanhgyanghgouj Gingjgih、Liengzgouj Yelangz Vwnzva Funghcingzyenz gij gingj- denj neix. Gingjgih Dungcai hung yienhsingz cujyau yienj cit heiq hung saedgingj Dungcuz 《Naenghhwnz》 caeuq vaiz doxdaemj doxdax; Gvanhdung Gingjgih banh cien vunz boq venz doxdax caeuq Dungcuz “Yezyej” hozdung; youq Cwngzyangz Bazcai Gingjgih, boq venz laengz roen coux hek、aeu naez namzgva doxbaeuh、daem ceizet、bak vunz doz mae daemj baengz biujyienj hozdung nauhyied ndeiyawj; gwnz Danhcouh Gingjgih, “Suh yenling” youz singz、cien vunz hopngomx aendauj buet、dwk giuzbaujlingz makbug、baksingz soengq gonjcien hozdung banh ndaej hoenghhwd; hoihmiuh Hozlij、Heiqdung baijyienj gij hozdung daegsaek Dungcuz neix, youq Yelangz Funghcingzyenz hoengh banh; Giuzbahdonz Gingjgih, diegdangz gangjguenj、ngaiz bak ranz Dungcuz、 boq venz caijdangz gij hozdung neix yinx vunzlai humx yawj; Sizmwnzcungh Gingjgih, cix aeu hozdung mizyinx daeuj yinx gyoengq hekyouz: Ndaw raemx gaeb bit doxdax、gwnz bya ra bauj、bin bya dangh rij……

Ndwenngoenz bae lumj naq, daj bi 2003 daengz bi 2013, cietdohyeh gaenq banh ndaej 10 bi lo, fwnfwn rumzrumz, cin ndaem cou sou, banh ciet ndaej hawj Sanhgyangh lijyouz hwnghoengh, hawj ginghci sevei cienzmienh vaiqriengj fazcanj, muengh cietdohyeh yied banh yied hoengh, beixnuengx Dungcuz saed- ceij bi beij bi vuenyungz.