Moix bi liggaeuq ndwenbet cibloeg, dwg hoihgeiz Hoihbo Gujlungz Yungzsuij Myauzcuz Swciyen Yanghfwnj Yangh. Ngoenz- neix, Yanghfwnj、Swyungz、Anhcuiz、Anhdai doenghgij yanghcin ndaw yienh neix gak cuz beixnuengx cungj caez comz daengz Bogujlungz, angqyangz dwk humx yawj max doxdik、boq Digmyauz gojlingz、doiq fwen、guhcaz daengj lai cungj lai yiengh vwnz dij minzcuz hozdung, doengzcaez angqhoh fungsou.

Yanghfwnj Yangh miz Myauz、Yauz、Dung、Cuengh、Gun lai aen minzcuz comzyouq, mwh geizgonq Ciuhcingh miz boux gungswngh ndeu vih coicaenh gak minzcuz yinzminz doxcaez aeueiq doxgyaez, doxgiet doxhuz, youq bi 1902 nienz heuh gyoengq goenglaux gak cuz seiqhenz Yanghfwnj daeuj doxyaeng laebbaenz le Hoihbo Gujlungz, dieghoih dingh youq Bogujlungz, seizgan dingh youq moix bi ndwencieng cibloeg caeuq ndwenbet cibloeg faen song baez banh, ndwencieng banh dwg yawh hoh fungsou, ndwenbet banh dwg angqhoh fungsou. Baenzneix, moix bi song ngoenz neix, gyoengq vunzlai gak cuz gij mbanj seiqhenz Yanghfwnj cungj angqvauvau comz daengz Bogujlungz, angq gvaq ngoenzciet, itcig cienz daengz seizneix.

Dangdieg miz hot fwen ndeu dwg baenzneix eu:“Bibi bae bo daengz Gujlungz, seizcou haeuxgwn cang rimrwd”. Ndigah moix bi baez daengz ciet hoihbo, vunzlai gak cuz cungj foenxfoenx bae bo, baenz bang baenz gyoengq, daenj ndangdaenj minzcuz moqsupsup gak saek gak yiengh youh ndeiyawj, bin bya gvaq dah, comz daengz Bogujlungz, angqangq yangzyangz guh gak cungj hozdung. Gyoengq vunz guh seng’eiq iq gak dieg, caemh dawz dangz mak、huqcab doenghgij doxgaiq ngoenzyungh haenx buen hwnj gwnz bo gai, lij miz vunz baij dan gai faenj、ceizet daengj gijgwn haekfeih haenx.

Ngoenz haenx, mbanj Myauzcuz ranzranz cungj naengj haeuxnaengj rangfwtfwt, baij laeujhaeuxcid caeuq byasoemj nohsoemj doenghgij byaek feih neix daeuj daihhek. Youq gwnz bo, gyoengq vunz eu fwen doiq fwen, humx yawj max doxdik、roeg doxdoj、gaeq doxdoj、foux saeceij, vanzlij cet bo caeuq ring saz gijgwn dem, ciengzmienh angqyangz hoenghhwd. Beixnuengx Myauzcuz moix bungz ciet hung cungj banh max doxdik hozdung, duzmax doxhaeb doxdik haenqrwd, gyoengq vunz humx yawj hemh ndei; youq gizdieg eu fwen doiq fwen, gyoengq vunz mbangj ndwn mbangj naengh, dingq dwk maezmwd, saekseiz cix angq dwk bek fwngz haenh ndei; gyoengq bouxcoz eu fwen engq daegbied, humx baenz gien baenz gvaengz, daegmbauq boq aen Digmyauz gojlingz, dahsau sing sepset rwenzred dwk riengz sing dig eu fwen, ciengzmienh doxgyaez doxndiep. Daihgya eu fwen ciengq go youh diuq foux, caenhcingz angqyangz, mbwn ciemhciemh laep lo, seizneix gwnz bo、gyang mbanj diemj feizdong hwnjdaeuj, ronghcangcang ingj dwk gwnz naj gyoengq vunz ronghyabyab, vunzlai mbangj humx feizdong ciengq go diuq foux, angq dwk gwn noh ring yawj yienjheiq; mbangj haeuj mbanj guh hek, gwn laeuj gangjgoj; mbangj bouxcoz cix doxcomz naenghhwnz, gangj gyaez gangj ndiep……