Ndangdaenj: Buhvaq aeu haeujsim bauj raeuj. Danhseih naengh mbouj dwg mbwn raemh- rwnh bienq gyoet, couh gaej daenj daiq lai daiq na daiq ndaet. Vahsug naeuz:“Buh lai nit lai”, ndigah daenj buh hix aeu habngamj cij ndaej.

Haeujninz: Seizdoeng hab ninz caeux hwnq gvaiz. “Ninz caeux”doiq gij vunz gyanghaemh guh’angq daeuj gangj miz daeg- bied cizgiz yiyi.“Hwnq gvaiz” dwg naeuz seizdoeng gyanghwnz haemq raez, gaej ranz caengz rongh doq cukcak hwnqmbonq, danhseih mbouj dwg naeuz hawj mwngz laihdai ninz gvaiz. Ninz daiq nanz caeuq ninz mbouj ndaek roxnaeuz ninz seizgan mbouj gaeuq doxlumj, cungj rox hawj vunz gamjdaengz ndang naet rengz naiq, baiz ok naengzlig doekdaemq.

Vanzging: Aeu baujciz ndaw rug、gwnz mbonq hoengheiq riuzdoeng ndei. Seizdoeng, vunz- raeuz aenvih lau nit cix baenz ngoenz baenz hwnz gven dou gven cueng, baenz hwnz denz goemq gyaeuj ninz, yienghneix guh gig mbouj ndei. Ndaw rug caeuq ndaw denz hoengheiq uqlah gawq sieng bwt sieng uk, youh yungzheih hawj vunz yinxfat baenz dwgliengz、huhgizdau ganjyenj caeuq gyaeuj ngunh、rengz naiq daengj bingh.

Yindung: Aeu ciengzseiz ok rog ranz bae hozdung. Boux yungh uk、bouxlaux caeuq lwgnyez, engq wnggai mbouj lau rumznit, lai ok rog bae dak ndit、guh dijcauh、menhbuet. Genhciz guh dijyuz yindung, doiq boux lwed lae baedauq haemq menh、boux baiz ok naengzlig doekdaemq caeuq boux rengz dingj bingh haemq yaez haenx daeuj gangj, ndaej demgiengz rengzndang. Dangh- naeuz ngoenznaengz genhciz yungh raemxgyoet swiq naj, bouxvunz engq mbouj yungzheih baenz siengfung dwgliengz.

Veiswngh: Seizdoeng gwn- ndoet cawz gangj veiswngh、cawj haeuxbyaek cug doq swnh ndat gwn le, lij aeu guh daengz “song hab”dem. It dwg hab gwn cab, couhdwg aeu gwn lai cungj lai yiengh, gaej genj gwn bien gwn. Ngeih dwg hab gwn bouj, boux ndang hawnyieg、boux baenz binghmenhsingq engq aeu gwn bouj. Ndaej lai gwn di maklaeq、haeuxcid、byaekgep、nohyiengz、nohvaiz、nohma、byalienz daengj gijgwn raeujdiemz hamz ndat lai youh ndaej dingj nit haenx. Boux ndang hawnyieg ndaej bae yiengq canghyw cingjgyauq, habdangq bouj gwn di yinzsinh、loegyungz、raetngaenz、cehmbu、bopbya daengj huqbouj ndeu.