2013 nienz 11 nyied 28 hauh, Vujsenh Yen Dungzlingj Cin Sinh- lungz Siujyoz gawjbanh Daihseiq Gaiq Hagseng Yindungvei. Baez yindungvei neix hai sam ngoenz.

Sinhlungz Siujyoz dwg Cuengh Gun song saw vah sonhag hagdangz, gawjbanh hagseng yindungvei miz minzcuz daegsaek lai. Bineix, aen yindungvei miz minzcuz daegsaek neix yinx ndaej haujlai lingjdauj、lauxhangz guh hong minzcuz gyauyuz haenx daeuj yawjngonz.

Youq gwnz hoih gaihmu, aen doih caijgeiz、doih gyong hauh、doih vahoengz hagdangz caeuq gak aen ban gungh 26 aen doih, youq geizguek、veiveih dazyinx baihlaj, riengz sing yinhyoz, yamqdin caezcup, doih riengz doih byaij gvaq baihnaj cujsizdaiz. Daengx aen hagdangz saeseng cungj sim angq naj hai, cingsaenz gvaekgvaek, ciepsouh lingjdauj caeuq vunzhek diemjyawj.

Youq gwnz hoih gaihmu, yienj vwnzyi cezmuz ndeiyawj raixcaix, hagdangz habciengqduenz hagseng fwngz fouxdoengh vahoengz, ciengq 《Go Hoengzsing》、 《Lwgnyez Guekcoj》, byaujdaz le gyoengq lwgnyez ndiepgyaez guekcoj, sienh soh dwggyaez；it nienzgaep hagseng diuq foux《Minzcuz Fungh Ceiq Ndongq》, mizrengz youh hab cezcou, gangjgej le gij funghcaij dijyuz yindung Sinhlungz Siujyoz angq- yangz、 cangqcwt、 huzndei haenx.

Youq gwnz ciengz giuzlamz, yindungyenz haenqrengz doxbuek, sing sauq sing hemq yiengjoo.

Youq gwnz ciengz denzging, sing cungq fatlingh yiengjbaba, 400 mij buet cingq doxdax, yindungyenz iqet mwngz gyaep gou buet, yiengq giz satbyai cung bae. Ceiq lwenqda dwg doxdax ringx giendiet, aen hanghmoeg miz minzcuz daegsaek neix yinx haujlai lwgnyez daeuj yawj, hemq gyayouz sing dingz sing hwnj, daihgya cungj vih doih swhgeij dajheiq.

Youq ndaw sam ngoenz doxdax neix, gyoengq yindungyenz cungj fazyangz dijyuz cingsaenz “engq sang、engq vaiq、engq ak”, cizgiz camgya, haenqrengz doxdax, swnh- leih doxdax caez gak aen hanghmoeg, miz 6 aen ban ndaej faen lai, ndaej daengz duenzdoih ciengj, miz 320 boux doengzhag ndaej ciengj.

Doxdax sat le, youq gwnz hoih bimu, Lai Cwngliengz yaucangj gangj: Baez yindungvei neix, doidoengh hagdangz raeuz guh ndei hong “minzcuz dijyuz haeuj hagdangz”, diuhdoengh hagseng cizgiz camgya dijyuz yinlen, sawj hagseng ndaej daezsang doxdax suijbingz, gyagiengz suciz ndang- daej.