Moix bi liggaeuq ndwenloeg, beixnuengx Bouxcuengh Ginhlungz、Cuzbuz、Vujdwz Lungzcouh Yen doenghgij yanghcin neix cungj gvaq aen ciet ngoenzseng naz conzdungj ndawbiengz ndeu —— “ciet ngoenznaz”, youq ndaw angqyangz mbaenj haeuxgwn gogo fungsou、 doenghduz sanj lai、lauxnyaeq ndang ndei, vunzmbanj gvaq saedceij hoengh- hoengh vuenghvuengh, angqyangz vuenyungz.

Riuznaeuz mwh ciuhgeq nduj, gyoengqvunz mbouj rox haeuxnaz gwn ndaej, seizhaenx baenz benq baenz doengh haeuxnaz cwx couh hwnjmaj youq laj dinbya henz ndoengfaex, naedhaeux hung lumj aen makbug nei, gag maj gag loenq, gyoengqvunz yawj cungj mbouj yawj. Goengsaenzmbwn lwnh naeuz gyoengqvunz nyi haeuxnaz gwn ndaej, caemhcaiq song vunzraeuz baenzlawz gwn. Gvaqlaeng, haeuxnaz maj baenz le couh gag loenq roengz ringx haeuj ndaw ranz gyoengqvunz, hawj vunz cawj gwn. Ngoenz he, miz song cejnuengx ranz vunz he aenvih doxceng cix dub naedhaeux ringx haeuj bakdou daeuj haenx soiq bae. Naedhaeux deng dub le gipmuengz buet haeuj ndaw lueg bae, mbouj gamj okdaeuj. Ndaw mbanj miz boux coz heuhguh “Swlij” ndeu caensim dwk haeuj lueg bae ciep haeuxnaz dauqma, lij caux naz dajcae dajrauq le, ndaem gohaeux roengz ndaw naz bae, hawj gohaeux yied sanj yied lai, ciengx doh gyoengqvunz gwnzbiengz. Vih gyo’mbaiq gij aencingz goengcoj vih gyoengqvunz caux nazreih、louz haeuxceh haenx, gyoengq lwglan Bouxcuengh couh youq moix bi liggaeuq ndwenloeg haeuxgyang ndaem sat le, banh caeqbaiq、 bauqaen hozdung, cungj hozdung neix heuhguh “ngoenznaz”, eiqsei dwg ngoenzseng gaiqnaz.

Lungzcouh Yen gak cunh mbanj ngoenz gvaq ciet cix mbouj doxdoengz, gijneix dwg fuengbienh caencik baengzyoux doxcunz baedauq, vunzmbanj ngoenzneix gou bae mbanj mwngz gvaq ciet, ngoenzcog mwngz daeuj mbanj gou doxcomz, lienzdaemh geij ngoenz, gij mbanj rangh neix ngoenzngoenz gvaq ciet, nauhyied dangqmaz. Mwngz baez byaij haeuj aen mbat dawzngoenz gvaq ciet, caenh raen ranzranz nyaengq loengh byaek nda daiz daihhek, ndaw mbanj banh miz vwnzyi yienjok、lanzgiuz doxdax caeuq bengcag doxdax doengjgij vwnz dij hozdung neix. Ngoenz gonq ngoenzciet, gyoengq vunzmbanj couh nyaengqnyi’nyi dwk guh ceizndek、ceizrangh、haeuxnaengj、faenjcaeu、haeuxsei、saejlwedmou gijgwn lai cungj lai yiengh neix; daengz haet ngoenzciet le, ranzranz couh gaj bit gaj gaeq, loengh saejlab、nohcaq doenghgij byaek haekfeih lai yiengh daihhek, moix ranz cungj loengh baenz sam haj daiz、bet gouj daiz byaek daihhek. Ndaw mbanj sing gingq laeuj sing riu goksasa; gwnz diegdangz doxdax caemh sing hemq gyayouz gyukgyadgyad, daengx mbanj angqyangz vuenheij、hoengh- hoengh hwdhwd.

Youq ndaw gyoengq vunzhek, cawz miz gij vunz dangdieg le, haujlai hekyouz ndaw guek caemh angqyangz ganj bae gvaq ciet yawj nauhyied; aenvih rangh mbanj dep Yeznanz, ndaw vunzhek caemh raen miz hek Yeznanz daengz, ndaw mbanj bouxhek bouxcawj, roxnaj mbouj roxnaj, najriu doxdongx, heuh haeuj ranz gwn ngaiz, yienghsiengq doxhuz andingh, hawj vunzhek roxnyinh lumjbaenz ma daengz ranz bonjfaenh……