Miz ngoenz ndeu, gou naengh youq ndaw aendiemq baengzyoux caeuq baengzyoux gangjgoj gaij mbwq.

Seizneix, miz boux sai seiqcib lai bi ndeu byaij haeuj ndaw diemq daeuj, de cawx bau ien cib maenz ngaenz ndeu, cix ndenq hawj baengzyoux gou mbaw cienz bak maenz he. Baengzyoux gou bouj mbaw hajcib maenz ndeu caeuq song mbaw ngeihcib maenz hawj bouxde. Danghnaeuz dwg youq biengzseiz, bouxcawx itdingh habhoz yienghneix bouj ngaenz, aenvih yienghneix bouj mbawngaenz mbouj lai, ce youq ndaw daeh mbouj ciemq dieg. Hoeng bouxsai cix ndenq ngaenz dauqma hawj baengzyoux gou, heuh baengzyoux gou cienzbouh vuenh baenz mbaw cib maenz liux. Baengzyoux gou doq vuenh ngaenz doq geizheih dwk cam naeuz:“Mwngz yaek dawz baenzlai mbaw cib maenz bae guhmaz ne?” Bouxsai han naeuz: “Gou yaek dawz bae hawj daxmeh gou.”

Bingzseiz dawz di ngaenz hawj bohmeh guh lingzyungh, neix bonjlaiz dwg gienh saeh bingzciengz ndeu, gou hix gingciengz baenzneix guh, mboujgvaq gou hawj mbaw bak maenz haemq lai, gaxgonq cietgingqlaux, gou dauqma ranz yawj bohmeh, couh faenbied hawj songde moix boux bak maenz, gou nyinhnaeuz, mbaw bak maenz he dawz fuengbienh. “Vihmaz mbouj hawj mbaw bak ndeu ne? Mwngz noix cit ci ien he, couh gojyij aeu mbaw bak haxbaenh haenx hawj daxmeh mwngz lo!” Gou laihnaeuz de dwg boux yinxien, mbaw bak maenz haenx lij nyam bau ien ne, lixlw caiq hawj daxmeh de, couh nyaenx mbouj ndaej dwk naeuz de. Hoeng, gij vah de dap hawj gou caeuq baengzyoux cungj doeksaet raixcaix, gou soqlaiz cix mbouj yienghneix yawj saeh gvaq.

De naenz: “Gou mbouj dwg yinx cit ien, cij dwg yaek vuenh di ngaenzling. Daxmeh gou ciuhvunz youq lajmbanj, gaenxguh mbaetgwn guhranz, cungj sij mbouj ndaej yungh ngaenz, danghnaeuz gou hawj daxmeh mbaw bak maenz ndeu, de couh nyinhnaeuz mbat ndeu yungh bae bak maenz, de couh sij mbouj ndaej yungh, couh yo dwk mbouj yungh; danghnaeuz hawj de mbaw cibmaenz, moix baez yungh mbaw ndeu, de cix mbouj hojsik geijlai, caiqnaeuz, couhcinj yungh bae mbaw he, lij miz baenzlai mbaw ne. Yienghneix, de cix onjsim yungh lo, neix dawz ngaenz hawj daxmeh cij miz yungh ha.”

Gou sawqmwh roxnyinh gvaengzda miz di fatndat, hauqswnh bohmeh, lij miz cungj fuengfap saeqnaeh ndeu, neix couhdwg dawz ngaenzling hawj bohmeh.