Lungzswng Gak Cuz Swciyen Lozgyangh Yangh Dilingz Dungcai moix bi liggaeuq ndwenloeg ngeihseiq cungj banh aen hozdung vwnzva fungsug minzcuz “ngaiz bak ranz” bi banh baez ndeu, vunzmbanj Dungcuz cungj cingj caencik baengzyoux daengz ndaw mbanj caez ciengq go diuq foux, boq venz caijdangz, yawj roeg doxdoj, guh gak cungj gak yiengh vwnz dij hozdung, gak ranz lij dawz gij nohsoemj、bitsoemj、byasoemj ndaw ranz iepguh haenx daengj byaeknoh daegsaek caeuq laeujhaeuxcid comz daengz henz giuzndojfwn gyaeuj- mbanj, caeuq baengzyoux caencik caemh gwn “ngaiz bak ranz”, gangjgoj yaeng saeh demgiengz doxgiet.

“Ngaiz bak ranz” Dilingz Dungcai dwg daj aen gojriuz gaeuqgeq gyaeundei ndeu cienz roengzdaeuj. Riuz naeuz seiz ciuhgeq, ranghdieg Dilingz Dungcai deng iugvaiq raemxrongz guhhaih, doenghnaz couh yaek deng dumh, ranz couh yaek deng dongj doemq, gyoengqvunz couh yaek deng duzgvaiq raemxrongz gienj bae, sawqmwh miz boux yinghyungz ndeu daj gwnzmbwn mbin roengzdaeuj, yaengx fajfwngz rengzrwd de raemj gat ndokhwet duzgvaiq raemxrongz, gouq le gyoengq vunzbiengz. Vih docih bouxyinghyungz, mbanj Dungcuz ranzranz cungj siengj cingj boux- yinghyungz bae ndaw ranz bonjfaenh gwn ngaiz, hoeng bouxyinghyungz haetlaeng couh yaek baema, mbouj ndaej ranzranz bae guh hek caez, baenzlawz guh ne? Seizneix, miz dah sau Dungcuz ndeu siengj le aen cawjeiq ndei ndeu: Moix ranz guh geij yiengh byaek swhgeij guh ndaej ceiq ndei haenx, comz hwnjdaeuj baij daiz daengx mbanj vunz doxcaemh dakdaih bouxyinghyungz. Aenvih donq ngaiz neix comz gij ndei bak ranz, ndigah couh heuhguh “ngaiz bak ranz”. Daj seizhaenx hwnj, Dilingz Dungcai roeb miz hekgviq roxnaeuz miz saeh’angq vunz coengcug doxcomz seiz, cungj baij “ngaiz bak ranz”, cungj fungsug neix itcig cienz daengz seizneix.

Seizneix, “ngaiz bak ranz” gaenq baenz Dilingz Dungcai aen cietheiq ndeu, seizgan dingh youq moix bi liggaeuq ndwenloeg ngeihseiq youq henz giuzndojfwn “Giuzfuk” banh. Ngoenz neix, ndaw mbanj ranzranz cungj yungh gij dinfwngz ceiq ndei bonjfaenh loengh daiz byaek feih ndei ndeu, lij guh ceizndek、“hing haj cungj feih”、guhcaz、naengj “ngaiz ndaem hom”, dawz bae gwnz “ngaiz bak ranz” caeuq vunzmbanj bouxhek caemh gwn. Gij beixnuengx Dungcuz youq baihrog guhhong haenx caemh cungj ganj dauqma doxcomz, lij cingj gyoengq caencik baengzyoux caez daeuj gwn ngaiz dem. Daihgya caez dajcuengq siuyieng caeq Baeuqgvangoeng gwnz “Giuzfuk”, mbaenj rumz dingh fwn yinz. Riengzlaeng vunzmbanj buenx gyoengq hek naengh youq henz daiz raezrangrang haenx, caemh gwn laeujhaeuxcid, baez daiz gingq laeuj, gwn “laeujgyauboi”, mwh gwn ngaiz lij miz “gyaeujgaeq soengq hawj hek”、“youzcaz daih hek”、“byaeksoemj laeujhaemz daih hek”、“gwn laeuj- baenqcienq” daengj gvigawj geizheih haenx, angqyangz ndawde caemh roxlaex, gyukgyad ndawde yienh huzndei, nauhnauh yiedyied, angq- angq yangzyangz…… Vunz Dungcuz miz cungj gangjfap ndeu: “Gwn ngaiz bak ranz, lienz sim bak ranz, gyaep bak cungj sez, guhbaenz bak yiengh saeh”. “Ngaiz bak ranz” dwg ngoenzndei vunzmbanj doxcomz, caemh dwg cungj fuengsik youq- gaenq yaengdingh、doenggvaq caeuq hengzguh gvigawj nem iekdingh ndaw mbanj ndeu, lij dwg gizdieg gietdingh comzbanh saeh vunzlai daengx mbanj ndeu. Youq mwh gwn ngaiz, daihgya miz maz gangj maz, cungjgez gaxgonq, maeuzveh daengzcog, gangj ok siengjfap guhfap bonjfaenh, demcaenh daengx mbanj doxgiet.