Mboujgvaq, baez cairengx haenq neix, caemh coi boux goengdaeuz Guengjsae caiq bae ngeixnaemj: Wnggai guh cosih gijmaz, cij ndaej daj goekgaenq gaijcawz gij cainanh cairengx haenx.

Miz baez ndeu, Veiz Gozcingh caeuq seizhaenx guh Swcigih Gohveij fucujyin Dauz Hihcin doxyaeng saeh cairengx Guengjsae. Dauz Hihcin dwg youq 60 nienzdaih co daj Cunghyangh cuengqroengz daeuj Guengjsae, caengz daeuj gaxgonq, de dwg boux Gozvuyen fumisuhcangj ndeu. Mehyah de Cuh Lenz youq mwh hoenxciengq dwg boux Veiswnghbu bucangj 129 Swh, boux lauxhangz citcim okmingz ndeu, caemh cuengqroengz daeuj Namzningz guh boux fusicangj. Dauz Hihcin mizyinx dwk gangj gij gamjsouh de bae Diegndoeng Vahbingz maeuqdiemj haenx. Diegndoeng Vahbingz youq baihnamz Lungzswng Gak Cuz Swciyen, liz Gveilinz Si 50 goengleix gyae. Gizneix miz benq ndoenglaux gvangq 130 lai bingzfueng goengleix ndeu, miz faexdaeq、faexrin、faexgaeujgaiz、faexbegsin mbawceg、suijcinghgangh、faexraq- raizguk、doenghgo faexgauj daengj gofaex gyoebbaenz benq ndoengfaex mbawhung ciengzheu yayezdai, miz faexcoengz riengjmax、faexbek Fuzgen、faexraq、faexcazmoeg、faexmaklimx、 gofaexyinzsanh daengj gofaex sangneng dijbauj, gizde dwg ndoeng doenghgo okmingz Guengjsae, dwg suen goyw sengcingz, suen doenghduz hung, dwg diendangz duzroeg, seiqgyaiq gova. Bi 1961 baenz aen daih’it diegbaujhoh swyenz Guengjsae, doeklaeng youh ndaej lied haeuj diegbaujhoh swyenz gaep guekgya ndeu. Dauz Hihcin gaxgonq bae baihde guh diucaz gvaq, de fatyienh, mboujguenj baihrog hawq baenz yienghlawz, gizneix fwjfuemx, seiz mbouj seiz lij doekfwn, raemx gwnz bya, daengxbi daj lajnamh caeuq ndaw ngabrin lae okdaeuj. De naeuz: “Ndoengfaex dwg aen daemzraemx yawj mbouj raen ndeu, doek fwnraq, de cix rom raemxfwn hwnjdaeuj, mbwn rengx le, de youh raemx laecetcet, seizfwn mbouj baenz raemxrongz, seizndat mbouj baenz mbwn rengx. Ndigah, siengj daj gaenbonj bae gaijgez cairengx daeuj hangz, itdingh aeu ndaem faex cauh ndoeng.”

(caengz sat)