Vengq diemx mbang ndeu, bu youq gwnzdieg dingjlaeuz, gwnz diemx baij miz gak cungj gijgwn, dahlwg iq gou dawz aen vadaeng yaepyep caeuq daxmeh de gangjgoj guh’angq, giz mbouj gyae miz gyoengq baengzyoux cingq gwn laeuj, yungh fuengsik gyoengqde gvaq ciet cibngux. Gou gyaez nauhyied, hix maij caemdingh, mbouj rox vih gijmaz, haemhneix gou mbouj miz saek di simgei caeuq gyoengq baengzyoux itheij guh’angq gwn laeuj .

Gou daep aen wjgih, ndaw soujgih cingq cuengq diuz ganghginzgiz Sizcin 《Ganghginzgiz Doengxhaemh》rwenzrwd, hawj gou sim engq dingh lo, aensim hix caeuq aenndang ninz youq gwnz diemx haenx soengset roengzdaeuj, doengxngoenz cienfanh saeh simnyap haenx hix mbouj guenj lo. Dinghdingh dwk, songda yawj daengz gwnzmbwn, yaek ra aen ronghndwen youq gizlawz, hoeng cij raen benq fwj baihlaeng de miz rongh mumjgyumq, couh lumj dahsau launyaenq yungh baengzsa gyuem naj nei, hawj gou engqgya siengj yawj naj gyaeugyet de. Ronghndwen lumj rox gij sim’eiq gou, ndonj haeuj benq youh benq fwjhau, lumj yaek caeuq gou doxraen, hix lumj dwg daegdaengq caeuq gou doxndoj, yaep ndeu loh’ok buenq fajnaj de, yaep dauq ndoj hwnjdaeuj, yaep rongh yaep laep, couh lumj cuengq denyingj ityiengh, dauqfanj hawj gou ngeix daengz aen youh aen vehmienh. Gou menhmenh laep da hwnjdaeuj, yawjraen gokda daxmeh lai nyaeuq loh, rumziq ci luenh le byoemgyaeuj de, najbyak geij dug byoemgyaeuj raiz haenx duiq roengzdaeuj, riengz rumziq mbinfefe. Daxmeh hix muenghyawj ronghndwen, daj ndaw lwgda de ndaej yawj ok, de miz di siengsim, neix dwg gij siengsim bouxmeh siengj lwg ha. Gou caiq yawjraen daeggo aenndang byombyet, goknaj doedok, haenx dwg daeggo baenzseiq lauxsaed dwgrengz ha, siengj daengz doenghbaez gyoengqde vih soengq gou doegsaw mbouj rox ok le geijlai goengrengz, hoeng youq ngoenz daegbied neix, mbouj ndaej buenxyouq henz ndang gyoengqde……Mbouj rox dwg naed raiz seizcou ruenz daeuj roxnaeuz raemxda siengsim gou lae okdaeuj, gokda gou gaenq mbaeqmbet lo, raq rumziq ci daeuj, gamj daengz miz di caep ndeu, gou ganjvaiq dawz gokda uet seuq, lau dahlwg caeuq yah gou yawjraen, hawj gyoengqde hix gaen gou siengsim.

Caj gou caiq hai lwgda daeuj, gingjsaek gwnzmbwn senq mbouj doengz lo, gij fwj daxbaenh mbouj rox deuz daengz gizlawz bae lo. Gwnzmbwn lamzsisi, couh lumj raemxhaij cinghseuq, cingx lumj gingq, geij aen ndaundeiq laengz- saengj mbin youq gwnzmbwn, miz baez yaep geij mbat, lumj cehda yaek laep haenx nei. Seizneix, gou dauqdaej yawj ndaej cingcuj aennaj ronghndwen lo, de lumj aenbuenz cinghvah cimq youq ndaw raemxhaij feuz youh cingx haenx, dwg yienghhaenx byaunyinh、caemdingh. Gou cim dwk, yawj dwk, hoenz gou menhmenh lizgyae ndangdaej gou, yied mbin yied sang, fwngz gou couh yaek lumh dawz aen ronghndwen gyaeundei haenx lo, gou caen siengj ndonj haeuj ndaw ronghndwen bae, yawj gij yiengh- siengq gyaeundei Cangzngoz ndaej hawj duzbya caem, hawj roegnyanh doek haenx; gou caen siengj bungj gop “raemxhaij” liengzsisi ndeu daeuj swiq naj, hawj bonjfaenh sim soengswtswt, swiq seuq gij nyapnyuk ndawsim, swiq deuz gij cabniemh bonjfaenh; gou engq siengj naengh hwnj aen ruziq, yunghrengz vad bae, dauqma daengz seiziq mbouj you mbouj heiq haenx. Hoeng, couhcinj gou baenzlawz mbin hix gyaep mbouj dawz aen ronghndwen, hix gop mbouj dawz gij “raemxhaij” haenx.

Seiqvunz bouxlawz cungj miz gij maqmuengh gyaeundei, roengzrengz le couh rox daengz saedceij bonjfaenh dwg geijlai vuenyungz, youq mwngz roengzrengz gvaq le, mwngz couh gamjdaengz, mbouj itdingh aeu bae saedyienh de cij ndaej hawj bonjfaenh daiq daeuj vaiqvued.

Loq dauqdaej lij dwg loq, dang gou dauq singj gvaqdaeuj le, dahlwg gou vanzlij caeuq daxmeh de angq dwk gangjgoj, sing riu de dwg geijlai diemz ha. Gou fwt singj gvaqdaeuj, neix nanzdauh mbouj dwg vuenyungz ha？Gvaq ndei moix ngoenz, guh ndei saeh bonjfaenh, moix ngoenz gvaq ndaej cungsaed, yienghneix couhdwg vuenyungz lo!