Youq Yinznanz Swngj Hungzhoz Hahnizcuz Yizcuz Swcicouh, miz aen minzcuz lauxgeq ndeu youq gizneix comzyouq, neix couhdwg Hahnizcuz, moix bi cousou sat le, gyoengqde cungj gvaq aen ciet conzdungj ndaw bi ceiq hoenghhwd ceiq hung ndeu——“cib nyied nienz”, couhdwg bi moq Hahnizcuz, dwg ngoenzciet Hahnizcuz daj- cuengq caeqbaiq saenzmbanj、goengcoj caeuq angq hoh fungsou、mbaenj bilaeng fwn yinz rumz dingh gogo fungsou.

Hahnizcuz ciuq gij ligfap ciuhgeq minzcuz bonjfaenh suenq, dawz liggaeuq ndwencib dangguh gyaeujbi, ngoenz ngoenzlungz daih- it daengz ngoenz ngoenzlingz dwg cietheiq seizgan, gonqlaeng haj roek ngoenz, dwg Hahnizcuz ndaw bi aen cietheiq ceiq nanz、neiyungz lai cungj lai yiengh ndeu, hoengh dangq ndwencieng Bouxgun.

“Cib nyied nienz” ngoenz daih’it, gij mbanj Hahnizcuz ranzranz cungj baet seuqsat, lauxnyaeq mbwksai cungj daenj ndangdaenj minzcuz moqsak. Moix aen mbanj cungj aeu doxcaemh dwk gaj duz mou ndeu guh doxgaiq dajcuengq, ciuq daengx mbanj hohsoq daiq ndok lienz noh dap ndei bingzyaenz faen hawj gak ranz, ndawde cienfanh gaej noix bae daepmou caeuq lwedmou, couhcinj faen ndaej gig noix, cungj aeu ranzranz faen ndaej, aenvih daepmou dwg gij doxgaiq dajcuengq goengcoj noix mbouj ndaej ndeu, lwedmou dwg lwnh hawj goengcoj rox doenghduz dwg cingqciengz gaj bw. Ndaw cietheiq, ranzranz cungj gaj gaeq gaj bit、guh ceizraemxrouh、daem et、gingq mbwndeih、dajcuengq goengcoj. Caencik baengzyoux doxlwnz cingjhek, doxcaez angq hoh ngoenzciet. Gyoengq mbauqsau cix doxiu bae rogdoengh gwnzbya, danz samyienz、boq Bahvuh、doiq fwen, gangj cingz dwen ndiep, ra boux roxsim. Gyoengq vunzmbanj comz youq gwnz diegdangz, yawj vwnzyi biujyienj, guh bi buengqyed、dwk lwggyangq、doxbeg daengj doxdax hozdung, ndaw mbanj nauhyied hoenghhwd. Banringz- gvaq, ndaw mbanj gak ranz gak hoh doxcaeh dwk ram aen daizngaiz ceiq ndei ndaw ranz daengz gyang gai, aen daep aen baij baenz le “ngaiz gai raez”, yienzhaeuh dawz gij byaek ceiq feih、ceiq miz daegsaek haenx baij hwnj daiz, yawj gvaqbae nohgaeq nohbya nohmou byaekheu daengj gak cungj gak yiengh saek ndei feih hom, hawj vunz myaiz raengh. Goenglaux ndaw mbanj daiq vunzlai caeqbaiq faexlungz、saenzmbanj sat le, “ngaiz gai raez” couh hainduj lo, daihgya yaengx cenj doxcaez angq hoh haeuxgwn fungsou, hoh daengx mbanj bingzan, bilaeng fwn yinz rumz dingh, daihgya roengzrengz bae guh caiq dued ndaej fungsou. Gyoengq mehmbwk lwgsau cix hopngomx youq henz daiz ciengq go diuq foux, aeu go foux “roix” hwnj donq  ngaiz raezrangrang neix, hawj ciengzmienh gwn ngaiz engq nauhyied, engq vuenyungz. “Ngaiz gai raez” dwg vunzmbanj Hahnizcuz daengx bi doxcomz mbat ndeu, dwg diuzsai lienzriengh caencingz ndeu, ndigah gwnz daiz dox gingq laeuj, caez gangjgoj, ciengzmienh doxhuz. Daihgya gwn imq le, gyoengq mehmbwk couh gaem aenvanj gwnz daiz doq ndaek doq ciengq diuq fouxvanj hwnjdaeuj; gyoengq dahsau cix fwngz gaem rongfaengx, angq- yekyek diuq hwnj le foux beizrongfaengx, itcig nauh daengz daengngoenz doekbya. Seizneix, diegdangz caemh diemj dawz le feizdong, gyoengq bouxsai haenq- rengz roq yiengj gyongmangz, yoekyoek yekyek diuq hwnj foux gyongmangz saenzmaed; vunzlai caemh caez hop humx gvaqdaeuj, angqyangz dwk diuq ha ciengq ha, gij sing bongh hwnj byonghmbwn, haprwenz mbouj gat……Cigdaengz gaeqhaen buemxsuemj, ndaw mbanj cij menhmenh camhseiz caemdingh roengzdaeuj.