Ndit seizdoeng doiq bouxlaux gengangh miz ik. Yenzgiu ndaej rox, seizdoeng bouxlaux lai ok rog bae dak ndit, mboujdanh ndaej fuengz baenz ndok soeng ndok byoiq, caemhcaiq ndaej gemjsiuj binghyoucaeuz dem.

Gij bouxlaux ciengzseiz soeg youq ndaw ranz、gig siuj ok rog bae dak ndit haenx, dingzlai dwg aenndang siuj veizswnghsu D, cujyau biujyienh dwg ndang hawnyieg、fanjying ngawzngwd caeuq baenz ndok soeng ndok byoiq daengj. Conhgyah nyinhnaeuz, seizdoeng gujli bouxlaux ok rog bae hozdung dak ndit, hozdung aenndang mbat ndeu, ndaej bangbouj yawhfuengz baenz ndok soeng ndok byoiq.

Yienhdaih yihyoz yenzgiu nyinhnaeuz, ndit ciuq daengz gwnz ndang vunz le, rox fatseng ithaehlied sengleix bienqvaq. Lumj hungzvaisen rox hawj conghbwn sailwed mbehai, hawj lwed lae baedauq gyavaiq. Youq swjvaisen cozyung lajde, lij ndaej hawj gij hwzswzsu yangjva、veisonh iemqok demlai, gij hezhungzdanbwz ndaw lwed, gai、linz、meij daengj hamzliengh hix gaenriengz swng sang.

Ndigah, seizdoeng mwh ok ndit seiz, bouxlaux wng caenhliengh ok rog bae hozdung, lailai dak ndit, yienghneix doiq ndangdaej gengangh daih miz ndeicawq.