11 nyied 23 hauh, Swcigih Minzyijveij youq Nanzningz haihoih Vahcuengh Sawcuengh suijbingz gaujsi Godiz Yenzgiu Gezdiz codanzvei, Swcigih Minzyijveij fucujyin Yangz Gijbyauh cujciz aenhoih. Ndawgih、gihrog gungh miz 29 boux lauxhangz yozcej daeuj camgya. Vahcuengh Sawcuengh suijbingz gaujsi godizcuj cujcangj、Cunghyangh Minzcuz Dayoz gyausou Lij Ginjfangh youq gwnz hoih guh《Vahcuengh Sawcuengh Suijbingz Gaujsi Yenzfat Hangh- moeg Gezdiz Baugau 》veibau, cungdenj gaisau godiz laebhangh、yenzgiu yinvu caeuq muzdiz; hanghmoeg fazcanj cingzgvang caeuq aeu ndaej cingzcik haenx; Vahcuengh Sawcuengh suijbingz gaujsi miz maz yingjyangj; gaujsi hanghmoeg laebdaeb fanzcanj naemjfap daengj gij neiyungz neix.

Gyoengq boux lauxhangz yozcej nyinhcaen dingq caeuq yawjdoeg godiz yenzgiu gezdiz baugau le, cungj nyinhnaeuz, Vahcuengh Sawcuengh suijbingz gaujsi godiz yenzfat yawj ndaej gyae, miz cauxmoq、miz gohyoz, yiyi naekhung. De ndaej bang boux camgya gaujsi rox daengz ciduva、byauhcunjvaq gaujsi, ndaej bang doengh boux loegyungh、bingz cizcwngh、swnghag haenx, caeuq nangdaengz gak hangh hong Vahcuengh Sawcuengh naengzlig nyinhdingh daezhawj baengzgawq; doiq coicaenh gak gaep Sawcuengh sonhag、doigvangq Sawcuengh gohyoz fazcanj miz leih. Baugau lwnhcingq cungfaen, dabdaengz godiz yenzgiu muzbyauh. Doenggvaq bingzsaemj, gyoengq lauxhangz doengzeiq godiz cingqsik gezdiz, gezdiz ndaej bingz guh youhsiu.