“Gyoengq hek seiqlengq comz hawfwen, bibi suenggangq sing fwen sep.” Yangduh Cin aen cin miz 5.37 fanh gyaeujvunz、 Bouxcuengh ciemq baenz 98.6% neix, “ndoj” youq diegbya gyae’gi baihsaebaek Denh- dwngj Yen, baihsae dep Dwzbauj Yen, baihbaek lienz Denzdungh Yen, liz yienhsingz 40 lai goengleix gyae, hoeng ngoenzciet conzdungj “ciet fwen suenggangq” aen cin gyae’gigi neix, moix bi cietheiq suenggangq geizgan cungj hoenghhwd gawjbanh eu fwen、doiq fwen doxdax caeuq foux lungz、lanzgiuz doxdax nem yienj heiq ndawbiengz daengj lai cungj lai yiengh hozdung, yinx baenz geij fanh vunzmbanj caeuq hekyouz daj seiq fueng bet baih ganj bae gvaq ciet.

“Ciet fwen suenggangq ciuhgeq miz, vih geiq goenglauz hung Cangznaij; gojsaeh lumj fwen daih cienz daih, beixnuengx caiq eu cienz bak bi.” Hot fwen sepset rwenzred neix dwg canghfwen Yangduh Cin aeu sing fwen daeuj niemhngeix haenh- danq gij saeh boux yinghyungz Bouxcuengh Cangznaij fuhyinz caeuq gyoengq beixnuengx dangdieg de daiq bae dingjhoenx vunzdig、dingjceng cauzdingz apbik haenx, caemh dwg aen hoenzgoek ciet mbaenj fuk suenggangq Yangduh. Riuznaeuz, boux Cangznaij fuhyinz vunz ndaw ranz daihdaih lienhgienz, aenvih ndatheiq aen biengz laepngauq seizhaenx cauzdingz nduknaeuh、vunzvaih danggienz、doiq rog doiqnyiengh、 doiq ndaw apbik haenx, gag gyoebcomz “henmbanj dungzmungzvei” dingjhoenx vunzdig, vutmingh cungj hen ranz bauj guek, doeklaeng aenvih vunzdig caeg’ep doxgap humxhoenx cix deng vutmingh, ngoenz de dai haenx, ngamj dwg daengx bi 24 aen cietheiq ndawde cietsuenggangq. Vih geiq- niemh boux yinghyungz mbwk Bouxcuengh neix, moix bi ciet suenggangq, vunzmbanj dangdieg cungj gag doxiu dwk bae daengz baihnaj aenmoh Cangznaij fuhyinz caeqbaiq, muengh hoenz yinghyungz dauqma ranzmbanj, mbaenj goeng- mbwn soengq fuk bauj bingzan. Youq ndaw hozdung caeqbaiq sam ngoenz sam hwnz, mbangj mbauqsau couh eu fwen daeuj lwnh gij cingz siengjniemh bonjfaenh, doeklaeng couh dingh moix bi ciet suenggangq le bungz sam ngoenz ngoenzhaw Yangduh gonq- laeng gungh 9 ngoenz guh “ciet fwen suenggangq”, faen baenz “gangqdaeuz”、 “gangqgyang”、“gangqbyai”, ndawde “gangqgyang” banh ndaej ceih hoenghhwd, nanz le couh baenz ciet fwen suenggangq daegbied neix, riuz daengz seizneix gaenq miz 300 lai bi lizsij.

Ngoenz ciet, dang sing fwen haidaiz “nanz mbouj eu fwen sim humzhaenz, diuzroen mbouj byaij nywjrum hwnj” haprwenz byongh- mbwn Yangduh le, gyonglaz riengzdwk roq yiengj lo, duzlungz saeceij caemh fangienj hwnjdaeuj, gwnzgai Yangduh yaepyet sing fwen sepset haprwenz、sing gangj sing riu gyukgyad, gwnz daizfwen, gyoengq canghfwen baen doih doiq fwen naemqsadsad mbouj faen sawhingz, hawj vunz dingq dwk maezmwd; dieg giuzcangz doxdax, gyoengqvunz humx yawj foux lungz foux saeceij、dwk lanzgiuz、bengcag daengj dijyuz doxdax, bek fwngz hemq gyayouz, ciengzmienh nauhyied; youq gwnz daizheiq, heiq ndawbiengz vunzmbanj gag bien gag lienh gag yienj haenx daengj vwnzyi biujyienj cit riengz cit hwnjdaiz, gyoengqvunz yawj dwk riengz angq riengz haemz deihdeih hemq ndei; youq gwnzgai, gyoengq- vunz cet gvaq aen dem aen dan dajgai, cawx huq daegsaek dangdieg, cimz faenjgienjdoengz、ceizcaqyouz, cawx maenz、biek、meggak daengj gijgwn fouz goenghaih……

“Gan ginz Yangduh lumj ranz ndeu, vwnzmingz lijmau haeuj fanh ranz; saedceij ciemh ndei raeuz haenhdanq, haenqrengz hamjyat coh siujgangh……”，muengh gij saedceij vunz Yangduh lumj ndaw fwen eu okdaeuj haenx nei, ngoenz beij ngoenz ndei, bi beij bi vuenyungz!