Cuhbazgai hai aen diemqgwn he, hoeng aen diemq de caemdikdik gaicawx mbouj baenz, Cuhbazgai naemj ha naemj, naemj ok aen geiqmaeuz he.

De youq bakdou venj gaiq baiz he, gwnzde sij naeuz: Gwnringz ndwi. Yienzhaeuh roq gyong bungbung, hemqgva’gva hwnjdaeuj: “Daeuj ha daeuj ha, neix hawj gwnringz ndwi bw, siengj gwn geijlai couh gwn geijlai, mbouj aeu cienz!”

“Caen mbouj aeu cienz?” Meuzgeq byaij gvaq bakdou, yaek saenq mbouj saenq.

“Dangyienz mbouj aeu cienz, mboujgvaq ne, dou aeu beijbeij dungx.” Cuhbazgai bekbek aendungx naeuz, “danghnaeuz mwngz gwn ak gvaq gou, couh mbouj sou cienz mwngz; danghnaeuz mwngz gwn noix gvaq gou, yienghneix gij doxgaiq song boux dou gwn haenx, cungj dwg mwngz ok cienz.” Meuzgeq ceiq dam gwn lo, seizneix de souh mbouj ndaej “gwnringz ndwi” ciunyex, gig siengj ciemq de bienzngeiz, couh dapwngq lo.

Meuzgeq mbat ndeu gwn 18 aen baunohbya, youh mbat ndeu ndoet 18 vanj dangnohbya. Cuhbazgai riu riu, lienz gwn 36 aen baunohbya, lienz ndoet 36 vanj dangnohbya. Meuzgeq saw lo, cijndei ok gij cienz 54 aen baunohbya caeuq 54 vanj dangnohbya, doeknaiq dwk byaij lo.

Manaez hix siengj daeuj ciemq bienzngeiz. De mbat ndeu gwn 38 aen baunoh, youh mbat ndeu gaet 38 gaemz gagaeq. Cuhbazgai lijdwg riu riu, dawz 72 aen baunoh caeuq 72 gaemz gagaeq okdaeuj, soebsoebsoeb yaepyet couh gwn seuqsat.

Doeklaeng, maxloeg caeuq duzlingz hix siengj daeuj ciemq di bienzngeiz, hix cungj saw lo. Cuhbazgai nyaengq geq cienz, riu dwk bak ajloengloeng, daekeiq dangqmaz.

Miz ngoenz he, duzhozmaj daeuj daengz ndaw diemq. Cuhbazgai cam:“Mwngz hix siengj daeuj gwnndwi ma?”

“Dangyienz dangyienz.”Hozmaj gangj le, aj bak couh gvangxgvat gij bau ndaw diemq roengz dungx bae liux, lij naeuz:“Mbouj gaeuq mbouj gaeuq, gou lij iek.” De byaij haeuj ranzsaeuq, yawjraen gijmaz cungj saeg gwn liux, lij naeuz:“Caen siujheiq, lijmiz gijmaz ndeigwn vaiq di dawz okdaeuj!”

Cuhbazgai deng hwk ngawz lo, “boeb” sing he gvih roengz namh bae, gou hozmaj cuengq gvaq de.

(haj nienzgaep Meiz Meiz)