Youq ndaw gyausiz, gyoengq lwgnyez yaengx dwk gaiqbaiz gwnz sij miz “o、u、w、i” gij cihmeh haenx, dox ra “baengzyoux”, lauxsae heuh song boux “baengzyoux” gyoebbaenz cih yinhmeh Sawcuengh ndeu, heuh boux hagseng ndeu doeg, doeklaeng hawj gyoengq hagseng daeuj bingzbuenq roxnaeuz gaijcingq……11 nyied 8 hauh, Dwzbauj Yen youq Lungzsangh Cin Cunghsinhyau hwnj dangzgoq goenghai Cuengh Gun song saw vah sonhag ndeu. Youq gwnz dangz, hagseng doenggvaq guh’angq daeuj geiq cihmeh yinhmeh, nauhyied dangqmaz. Ndaw yienh Lungzsangh、Duh’anh、Nazgyaz daengj 3 aen yangh(cin) cunghsinhyau caeuq yienh gyauyenzsiz、yienh Sawcuengh hagdangz 80 lai boux lauxsae、lauxhangz camgya dangz goq neix.

Youq Swcigih Gyauzyuzdingh cijdauj baihlaj, bineix 5 nyied, Dwzbauj Yen ginggvaq gohyoz gveihva、dungjcouz anbaiz, gietdingh dawz Duh’anh Yangh Cunghsinhyau、Lungzsangh Cin Cunghsinh yau、Nazgyaz Yangh Cunghsinhyau、Duh’anh Yangh Gizgyangh Cunh Vanzsiuj、Nazgyaz Yangh Dingluz Cunh Vanzsiuj、Nazgyaz Yangh Dohmu Cunh Vanzsiuj、Nazgyaz Yangh Naluz Cunh Vanzsiuj daengj 7 aen hagdangz lied haeuj daengx yienh Cuengh Gun song saw vah sonhag “sifan gihdi” gensez fanveiz. Vihliux gyagiengz Cuengh Gun song saw vah sonhag fuengfap caeuq yenzgiu, daezsang lauxsae sonhag suijbingz, caux aen fwnveiz ndei Cuengh Gun song saw vah gyauyuz yenzgiu, Dwzbauj Yen cizgiz gaihcanj Cuengh Gun song saw vah sonhag yenzdauj hozdung, daengz seizneix, gaenq guh gangj Vahcuengh gojgaeq doxdax、sij Sawcuengh doxdax、gwnzdangz sonhag doxdax daengj hozdung 16 baez.

Doenggvaq guh gij hozdung neix, sawj Dwzbauj Yen Cuengh Gun song saw vah sonhag cizlieng mboujduenh ndaej daezsang, baenz le daengx gih Cuengh Gun song saw vah gyauyuz doengzyamq sonhag、ngeihloih mozsi sonhag sawqniemh sifan cozyung.