Moix bi liggaeuq ndwenngeih ngoenzmaux daih’it, Lungzswng Gak Cuz Swciyen Lozgyangh Yangh Baujcwng Cunh gyoengq beixnuengx Dungcuz doxcomz youq diegdangz, caez angq yangz gvaq “cietcaeqsah” bi gvaq baez ndeu haenx. “Cietcaeqsah” dwg ngoenzciet dajcaeq conzdungj Dungcuz, gij hoengh de cij baiz baihlaeng ndwencieng. Ngoenz haenx, cawz guh hozdung dajcaeq le, gyoengq beixnuengx Dungcuz lij baijyienj le boq venz caijdangz、foux dohyeh、ngaiz bak ranz Dungcuz daengj swcigih gaep、si gaep feihvuzciz vwnzva yicanj, cimz gwn “sam bauj” Dungcuz, youq ndaw angqyangz gamjsouh gij daegsaek gagmiz caeuq gij vwnzva gyaenanz Dungcuz.

“Sah”(vah Dungcuz eiqsei dwg daxbuzcoj) caprag youq ndaw vwnzva conzdungj Dungcuz lienzriengh baenz geij cien bi haenx laeglwdlwd, dwg diuzsai cingsaenz hotnangq swnghhoz vwnzva Dungcuz ndeu, vunz Dungcuz bouxboux cungj mbaenj de baujhoh. Youq Baujcwng nem doengh dieg Dungcuz seiqhenz haenx, gij gojriuz gvendaengz “Sah” miz geij cungj, cungj he riuz ndaej ceiq gvangqlangh: Seiz ciuhgeq, miz boux mehmbwk Dungcuz coengmingz naengzganq、simsoh simsienh ndeu, de daiq bouxgvan、rap lwg aemq nyez, byaij gvaq cien bya fanh raemx, danhfanz roeb daengz rangh dieg gvangqlangh caemhcaiq miz raemx laeret haenx, cungj baek diuzbiu guh geiqhauh, caiq lwnh hawj gyoengq lwglan Dungcuz mbouj miz reihnaz ndaem haenx, bang gyoengqde senj dieg ndei caeplaeb mbanjranz, cauh naz cauh reih, ndaem ciengx hwng ranz, hawj gyoengq lwglan Dungcuz ndaej sanj vaiq hwnghoengh, bingzan vuenyungz. Gvaqlaeng vunzraeuz vihle geiqniemh de, caep daizcaeq guh aenmiuh, daihdaih dajcuengq caeqbaiq. Daizsah guh youq gak diegdangzrin gyang mbanj Mbanjsangcai, vunz baez yawj couh rox de dwg bouxcawj aenmbanj, baujyouh bouxvunz doenghduz bingzan. Dajcaeq hozdung Baujcwng Cunh gaxgonq dwg gek 7 bi banh mbat ndeu, seizneix dangdieg souhaeuj demlai caeuq miz muenghgouz lai le, gaij baenz moix bi banh mbat he, youq liggaeuq ndwenngeih ngoenzmaux daih’it hoengh banh, caemhcaiq gij hozdung dajcaeq demgya le neiyungz moq. Haet haenx, gyoengq vunzmbanj couh riengzlaeng bouxdaiqcaeq guh “caeqseng” (aeu doenghduz lix dajcuengq)、“cunzyouz” (ram aengiuh siengqsaenz “Sahsui” bae gak aen mbanj Dungcuz henzgyawj youzbyaij soengq fuk)、“caeqcug” (aeu gijgwn cawjcug daeuj dajcuengq) daengj caeqbaiq hozdung le, riengzlaeng lij guh gij hozdung ciengq go diuq foux lai cungj lai yiengh caemhcaiq gig ndeiyawj haenx, youz gij doihbiujyienj vwnzyi gak aen mbanj gyoebbaenz, miz foux dohyeh、boq venz caijdangz、ciengq golaux、foux daem et、gangjgvanj、foux daengq、foux dubbaengz、go bizbaz daengj cezmuz go foux conzdungj Dungcuz, ndeiyawj yinx vunz. Biujyienj sat le, gyoengqvunz Dungcuz camgya hozdung biujyienj haenx caeuq hekyouz youh caemh daiz naengh youq henz daiz raezrangrang haenx, sangjswt haisim dwk gwn donq ngaiz conzdungj Dungcuz——“ngaiz bak ranz”, seizneix doiq fwen gingq laeuj, nauhyied raixcaix. Mbwn menhmenh laep roengzdaeuj le, aen hozdung vwnzyi biujyienj doengxhaemh youh hoenghhwd dwk hainduj lo, vunzmbanj caeuq bouxhek cungj angqyangz vuenheij dwk caenx bae humx yawj, ciengzmienh nauhyied hoenghhwd.