Betyaem boq nauh hoengh, leuxloh doengz sing ciengq, yienfwngz diuq foux angq, haenhdanq saedceij ndei. Moix bi bet nyied bet, seiqlengq hek daengz caez, Dahbetcik ngoenz- neix, vuenheij ciet betyaem……Doengh bi neix daeuj, ciet lijyouz vwnzva betyaem Bouxcuengh Yungh- ningz aeu betyaem guh cawjsienq, vih gyoengq bouxhek ndaw guek rog guek yienj le ciengz heiq yisuz ndawbiengz minzcuz ndeiyawj ndeu.

Youq ngoenzciet vwnzva bet- yaem Bouxcuengh, vunzraeuz ndaej yawj cien vunz nauh betyaem 《Betyaem Sing Hap Angqyangz Daengz》、cawjdaez vwnzva Beigiuh 《Loq Raen Byadingjsae》、fwen dangdieg 《Hai, Leuxloh》 daengj gij biujyienj miz daegsaek minzcuz neix; bae diuzgai daeng’va yawjngonz gij daeng’va gak cungj gak yiengh gig miz daegsaek haenx; bae gwnzgai cimz makhojlungz daengj gijgwn haekfeih baenz gwn haenx……Ciuq gaisau, betyaem Bouxcuengh Yungh- ningz dwg youz loxlez hung、loxlez iq、aendig haj congh、laz、gyong、ca、gyongndaek Bouxcuengh daengj gyoebbaenz, “betyaem” yaemsaek ndei dingq、sepset、rwenzred, hawj vunz ndawsim saenqdoengh, gyoengq nungzminz cungj gyaez dingq maij yawj, youq ranghdieg Yunghningz mingzdaeuz hung dangqmaz, dwg aen sukingj cungj guh’angq youh boq youh roq fungsug minzcuz ndawbiengz dieg Bouxcuengh Guengjsae raeuz. Betyaem Boux- cuengh Yunghningz lizsij gyaenanz, ndaej gangj daj Ciuhcingh satbyai couh miz. Seizhaenx, rangh dieg Bujmyau Nazlu, lajmbanj miz vunz aeu bawx haq lwg、ranz moq guh baenz、coux hek daih hek daengj hozdung angq hoh seiz, daihgya cungj cingj “ban betyaem” daeuj boq nauh, ndigah, betyaem Bouxcuengh couh hwnghoengh dangqmaz. Gvaqlaeng, betyaem Bouxcuengh Yunghningz youq gwnz giekdaej miz boqboq roqroq daegsaek fungsug minzcuz caeuq Bouxcuengh raeuz le, caiq gyasou gij ndei yinhyoz Guengjdoeng dem, ciemhciemh hwngfat baenz “betyaem Bouxcuengh Yunghningz” gig miz daegsaek Bouxcuengh raeuz haenx, caemhcaiq youq ranghdieg gvangqlangh ciengxlwenx hwng riuz, caprag ndawbiengz laeglili. Youq yenzdan、ndwencieng、“sam nyied sam”、betnyied cibngux、gozging daengj ngoenzciet angq hoh geizgan, doih betyaem nungzminz cungj bae gak aen mbanj biujyienj hawj nungzminz yawj. Seizneix, doih betyaem Bouxcuengh dieg Yungh- ningz miz aeu mbanj guh danhvei, caemh miz aeu yanghcin guh danhvei gyoebbaenz, youq Bujmyau、Nazraeuz、Sinhgyangh、Cunghhoz daengj yanghcin, moix aen cunh cungj miz geij aen doih betyaem, baez miz vunz heuh couh bae biujyienj, dan Yunghningz Gih boux rox boq betyaem haenx couh miz 300 lai vunz.

Doengh bi neix daeuj, Yunghningz Gih cwngfuj caeuq vwnzva bumwnz haenqrengz vatgud、baujhu、swnjcienz、haifat betyaem Bouxcuengh, daj 2005 nienz gvaq- daeuj moix bi cungj banh baez ngoenzciet yisuz vwnzva betyaem Bouxcuengh ndeu, lij bued ngaenz guh gij hong baujhu betyaem Bouxcuengh, laebbanh aenban betyaem Bouxcuengh bouxcoz lwgnyez, beizyangj boux caixhangz boq betyaem. “Betyaem Bouxcuengh Yunghningz” 2005 nienz ndaej Cunghsenh Bu、Vwnzva Bu soengq hawj aen cwnghauh “daengx guek senhcin duenzdaej biujyienj vwnzyi”, 2007 nienz ndaej Swcigih Yinzminz Cwngfuj lied haeuj buek daih’it swcigih gaep feihvuzciz vwnzva yizcanj baujhu mingzloeg, bineix 6 nyied 19 hauh, Aen Hezvei Vwnzyi- gyah Ndawbiengz Cungguek fat aen cwnghauh “mbanjranz vwnzva betyaem” hawj Yunghningz Gih.

Doengh bi neix daeuj, aendoih betyaem Bouxcuengh Yunghningz gonqlaeng camgya swcigih laebbaenz 40 hopbi、50 hopbi、ciet fwen go daengxbiengz Guengjsae、ciet yisuz fwen go daengxbiengz Namzningz、Cungguek - Dunghmungz Bozlanjvei、ciet vwnzva lijyouz daengxbiengz Baekging、Cezgyangh Hangzcouh Sihhuz Bozlanjvei、Gyanghsuh Vuzsiz Bozlanjvei daengj doengh gij hozdung biujyienj angq hoh hung neix, mingzdaeuz riuz doh ndaw gih rog gih.