Moix bi liggaeuq ndwenseiq cobet, Lungzanh Yen cungj banh aen ciet lijyouz vwnzva “naz” nem ciet hongdawz hoenghhwd ndeu, baijyienj gij vwnzva “naz” daegsaek daegbied gagmiz caeuq fungsug minzcuz yienghciuhnduj haenx, gij hozdung daiq miz yinh “naz” naekgywggywg haenx hawj gyoengq hekyouz ndaw guek rog guek yawj dwk maezmwd caemhcaiq deihdeih haenhdanq.

Ciet hongdawz “seiq nyied bet” Nazdoengz Lungzanh Yen gaenq miz 400 lai bi lizsij, nyuenz heuhguh cietcaemxbaed, saedcaeq dwg swnjcienz aen laex caeqbaiq fagcanjrin hung ciuhgeq, vunz Loegvet ciuhgeq youq mwh ndaemnaz sat le, cungj banh aen yizsi swiq seuq fagcae aenrauq souyo he, mbaenjgouz goengsaenzcoj hongnaz baujyouh fungsou, gvaqlaeng couh bienqbaenz aen fungsug sibgvenq gvaq ciet hongdawz.

Lungzanh Yen dangguh doenghgij diegfathwnj vwnzva “naz” Bouxcuengh ndawde aen ndeu, miz gij swhyenz vwnzva “naz” haenx lai raeuh youh gagmiz. Doengh bi neix daeuj, ndaw yienh Lungzanh lienzdaemh vat ok le fagcanjrin hung、aenyaenqheuj、goethaem ciuhgeq daengj vwnzvuz, raraen le guek raeuz cungj gohaeuxnaz ndaemganq ciuhgeq caeuq gohaeuxnaz cwx bingzciengz. Bineix 6 nyied faenh, Lungzanh Yen ndaej Cungguek Minzhez cingqsik soengqhawj aen cwnghauh “mbanjranz vwnzva ‘naz’ Cunguek”.

Ndaw ngoenzciet, gyoengq hekyouz ndaej bae cetcunz yawjngonz gij byaraemx doenghnaz yienghnduj dangdieg, bae camgya aen hawfwen hoenghhwd haenx, dingq canghfwen youq gwnz bez doiq fwen; bae humx yawj caeq saenzhaeux、foux lungzfiengz、foux fagcanjrin hung daengj fungsug minzcuz biujyienj gig lumj yienghciuhnduj haenx; lij ndaej bae cetyouz diuzgai gijgwn “naz”, cimz daeuhfouh Duhgez、bingjmeg samgak Bucenz、gaeq Dinghdangh daengj gijgwn haekfeih dangdieg, doengzseiz caemh ndaej yawj suek faengx、daem et、guh ceiz caeuq rap haeux gvaq giuzfaexdog、aeu fwngz fad haeux、gwnz dah vad ruz bengcag daengj gak cungj gak yiengh doxdax mizyinx haenx, danghnaeuz mwngz simhumz, cix ndaej haeujbae camgya doxdax, yiengjsouh faenh angqyangz ngoenz- ciet hoenghvuengh ndeu.