Gvaq 30 bi le seizhaenx aen ranzyouq baenzlawz yiengh, siengsaenq aen vahdaez neix gig ciunyex mwngz ba? Aen ranzyouq 30 bi gvaqlaeng dwg dauq ranz youh gaugaep youh saedyungh he!

Moixdang mwngz yaek byaij haeuj douranz seiz, bakdou rox saujmyauz aen ndang mwngz, dwg vunz ndaw ranz cij hawj haeujbae, danghnaeuz mbouj dwg, baez byaij gyawj couh deng dienh myab laemxroengz, cungj gauhgohgi neix hawj vunz ndaej mienx dawz yaekseiz sinhoj, youh ndaej mienx bae gij mazfanz lumzgeiq yaekseiz youq ranz mbouj ndaej haeuj ranz.

Haeuj ranz le, danghnaeuz mwngz duet buh roengzdaeuj, gyaqbuh couh gag byaij daeuj henz ndang mwngz, hawj mwngz ndaej fuengbienh cuengq buh、mauh、daeh daengj doxgaiq. Naengh roengzdaeuj le, densigih rox gag hai, mbouj yungh doengh fwngz, dangyienz engqgya mbouj yungh yauzgunggi, cigciep aeu fwngz baez vix, mwngz siengj yawj gijmaz cezmuz couh rox gag boq okdaeuj, yawj cizboh roxnaeuz yawj hoizdauqboq cungj ndaej. Mwngz hozhawq seiz, lwgfwngz doengh mbat he, couh miz raemx、gojloz、raemxmakcengz daengj doengh gij mwngz siengj ndoet haenx soengq daengz henz mwngz. Danghnaeuz mwngz mbouj siengj yawj densi, mwngz ndaej sikhaek bienq densi baenz dennauj, siengj dwk gijmaz youzhi couh dwk gijmaz youzhi, mwngz caen ndaej yiengjsouh lo.

Gwn haeux seiz, ngoenzneix siengj gwn gijmaz, youq gwnz daiz diemj mbat he, sikhaek couh miz gij byaek gij haeux baenz vanj baenz banz nyoengx okdaeuj. Gwn imq ndoet doh le, baenz hwnj mbonq ninz lo, youq ndaw rug cijaeu mwngz siengj ninz cungj mbonq lawz, de couh bienq cungj mbonq de okdaeuj. Dwg lo, gij fwngzhwnz loq mwngz, ndaej dwg fangzhwnz ndei, hix ndaej dwg fangzhwnz saenzgeiz……

Baenzlawz yiengh? Aen ranzyouq gvaq 30 bi le youh raeujrub youh an’onj, cungj ranz neix mbouj dwg mbouj miz hojnaengz bw. Ndeindei hagsib, itdingh naengz caux ok cungj ranz baenzneix ndei. Aen ranzyouq gvaq 30 bi, youh gaugaep youh saedyungh ba?

(haj nienzgaep Lanz Cihmung)