长塘镇军山庙会：民俗文化精彩纷呈

□ Lij Lili ingj Sinhyungz hoiz

Cet hawmiuh Ginhsanh, yawj yienj fungsug minzcuz. Moix bi liggaeuq ndwenseiq cobet, youq Namzningz Si Cinghsiu Gih Cangzdangz Cin Byaginhsanh, cungj banh ciengz hawmiuh hoenghhwd ndeu, vunzlai dang- dieg nem henzgyawj haenx caez comz daengz gwnz bya, caeqbaiq Lij Yavangz、ciengq go eu fwen haenhdanq Lij Yavangz, mbaenj vunzbiengz bingzan swnhleih、rumz dingh fwn yinz、gohaeux fungsou. Ngoenz haenx, gyoengq hekyouz caemh doxiu bae ganj hawmiuh, yawj lungz feizyieng mbawgyoij byaijyouz、heiqgoeng- sae、dik maxfaex daengj fungsug minzcuz biujyienj, ciengzmienh hoenghhwd nauhyied.

Hawmiuh Byaginhsanh gaenq miz baenz 300 bi lizsij, moix bi ndwenseiq cobet, gyoengq vunz- mbanj dangdieg Cangzdangz Cin、vunzlai Namzningz Si caeuq haujlai vunz saenqbaed diegwnq cungj caez benz hwnj Byaginh- sanh, daengz baihnaj ginendangz Lij Yavangz siu yiengj mbaenj fuk. Byaginhsanh dwg Namzningz Si seiqihenz 40 goengleix ndawde goengq bya ceiq sang ndeu. Gwnz bya aenvih miz aen ginendangz Lij Yavangz cix an aen mingz neix. Riuzcienz Lij Yavangz ngamq 10 bi seiz couh bae baiqsae hag bonjsaeh, goengfou lienh ndaej gig ndei, ndaej 18 bi seiz rox saw youh rox dwkgienz、vunz gvai rengz ak. Miz bi he, Dahyunghgyangh raemxrongz dumh seiqlengq, ndaw naz mbouj sou ndaej saek naed haeux, nungzminz fouz gwn fouz daenj. Hoeng, hakfouj lij bik nabliengz gya gveih. Lwgmbauq Bouxcuengh Lij Yavangz youq laj dinbya Byaginhsanh iucomz le aen bingdoih Bouxcuengh ndeu, hai cang ciengj haeux, faen hawj gyoengq beixnuengx souh hoj souh nanh haenx, gyoengq beksingq cungj gig gyaez de haengj bang de. Doeklaeng cwngfuj Ciuhcingh baij bing daeuj humxhoenx, bingdoih de deng humxlaengz youq gwnz Byaginhsanh, mbouj geij nanz haeux gwn liux lo, Lij Yavangz couh caeuq gyoengqdoih mbaet gij makcwx gwnz bya daeuj demh dungx, caeuq daihgya itheij dingj daengz bi daihsam ndwenseiq cobet, doeklaeng cienzbouh iekdai youq gwnz bya. Vunz Cangzdangz yawj Lij Yavangz dangq minzcuz yinghyungz, bang de deugaek aensiengq, caemhcaiq hwnjguh le swzdangz. Moix bi ndwenseiq cobet, gyoengqvunz cungj daj seiq fueng bet baih ganj daeuj benz bya camgya aen hawmiuh hoenghhwd neix.

Ngoenz hawmiuh, fungsug minzcuz hozdung lai cungj lai yiengh, cawz guh yizsi caeqbaiq le, lij miz foux lungz foux saeceij、foux geizlaenz、foux lungz feizyieng mbawgyoij、eu fwen doiq fwen、yienj heiqgoengsae、dik maxfaex、cuengq daengdah、hoihhaemh feizdong daengj haujlai hozdung mizyinx angqyangz vwnzva fungsug minzcuz Cangz- dangz Cin haenx, moix bi cungj miz baenz 10 fanh vunz hwnj bya ganj hawmiuh. Ngoenz haenx, doenghboux hwnj bya mbaenj fuk haenx cungj ndaej mienxfeiq lingx aeu daeh “haeuxfuk” ndeu maranz, ndaw “daehhaeuxfuk” miz haeuxsan、habfeiz、fouz- bingzan daengj, baenzneix ndaej dawz fugheiq、seizheiq ndei daiq maranz. Ngoenz neix, gwnz bya lij fat souhcai “fukfanhranz”, couhdwg daj gak ranz gak hoh comz haeuxsan daeuj dwk ndaw rek hung cawj cug, caiq fat faen okbae, caemh ndaej hawj ranzranz hohhoh daij daeuj bingzan、 fukheiq. Cingq aenvih hawmiuh Byaginhsanh miz gij riz vwnzva laeglwd naekgywg caeuq gij giekdaej vunzlai gvangjlangh haenx, ndigah hawmiuh caemh ndaej lied haeuj le swcigih feihvuzciz vwnzva yizcanj mingzloeg, yaek daih dem daih swnjcienz roengzbae.