Seizcou habdangq gwn cuk, ndaej huz dungx cangq mamx、nyinh bwt seng raemx、ciengx yaem siu sauj. Mwh cawj cuk seiz, habdangq dwk makleiz、lauxbaeg、lwgraz daengj roengzbae, ndaej nyinh bwt nyinh sauj.

Cuk makleiz: Aeu 2 aen makleiz, swiq seuq le lienz naeng daiq ngveih cab soiq, gya 100 gwz haeuxsuen dwk raemx cawj cuk. Makleiz nyinh sauj cozyung haemq ndei, dwg gijgwn ndei baujgen seizcou ndawde cungj ndeu.

Cuk maklaeq: Aeu 50 gwz maklaeq、100 gwz haeuxsuen dwk raemx cawj cuk. Maklaeq ndaej ciengx dungx cangq mamx、bouj mak nyangq nyinz、vued lwed dingz lwed, daegbied hab bouxlaux hwet in ga naet caeuq hohdaez in gwn.

Cuk lwgraz: Aeu 50 gwz lwgraz, 100 gwz haeuxsuen. Sien cauj lwgraz cug ngenz baenz mba, cawj cuk haeuxsuen cug le gyaux lwgraz gwn. Hab boux baenz haexgaz、boux bwt sauj baenzae、boux gyaeuj ngunh da raiz gwn.

Cuk lauxbaeg nding: Sien cauj lauxbaeg nding cug, gya 100 gwz haeuxsuen dwk raemx cawj cuk. Aenvih lauxbaeg nding hamz miz huzlauxbaeg doxgaiq, ndang vunz supsou le cienjvaq baenz veizswnghsu A, hab boux naengnoh hawqsauj、naengbak deglek gwn.

Cuk vagut: Aeu 60 gwz vagut, 100 gwz haeuxsuen. Sien dwk raemx baek vagut, caiq raenz aeu raemx de cawj cuk. De doiq sanq rumz ndat、siu daep huj、da nding gawh in miz ceihyw cozyung. Doengzseiz, de hix ndaej fuengzceih bingh sim sailwed dem.