融水苗胞新禾节：预祝丰收的传统节日

□ Cuh Miu ingj Sinhyungz hoiz

Moix bi liggaeuq ndwenloeg ngoenz coloeg, Yungzsuij Myauzcuz Swciyen gyoengq beixnuengx Myauzcuz haujlai yanghcin cungj angqyangz gvaq ciethaeuxmoq, ciuq gij fungsug sibgvenq、vwnzva ndawbiengz bonj minzcuz guh gak cungj hozdung, lij giethab gij gingjsaek caeuq gingjdenj gyaeundei haenx banh gak cungj gak yiengh vwnzdij hozdung, nauhyied hoenghhwd.

“Ciethaeuxmoq” caemh heuhguh cietbuenqbi、cietgwnmoq、ciet- haigimq, dwg ngoenzciet conzdungj beixnuengx Myauzcuz Yungzsuij yawh hoh fungsou ndeu, moix bi liggaeuq ndwenloeg coloeg hainduj banh, angq hoh hozdung itbuen lienzdaemh banh geij ngoenz. Ciuq ndawbiengz riuznaeuz, seiz ciuhgeq vunz Myauzcuz gungzndoq mbouj miz saek gaiq, baengh hwnj ndoi mbaet makcwx vat ragfaex gwn gvaq saedceij. Miz ngoenz he, roegenq mbin daeuj daengz ndaw ranz Myauzcuz, yaek ciq gizdieg laj yiemhranz guh rongz youq, vunz Myauzcuz dapwngq lo, lij aeu benj bang roegenq dap aen’gyaq guh rongz dem. Roegenq vih bauqdap vunz Myauzcuz, mbin bae dieg gyae mbin gvaq haij, daj lajdaej aenfa goemq mbwn sang dangqmaz haenx, gamz cehhaeuxcid dauqma soengq hawj vunz Myauzcuz. Ngoenz roegenq dauqma daengz Mbanjmyauz haenx, cingqngamj dwg liggaeuq ndwenloeg coloeg. Vih hawj lwglan daihlaeng ndaejgeiq ngoenz neix, vunz Myauzcuz dingh ngoenzneix guh ngoenz ciethaeuxmoq.

Ngoenzciet, mbwn ngamq buemxsuemj, boux vunzlaux gak ranz gak hoh couh bae ndaw naz daet aeu gaem haeuxbongz yaek okriengz ndeu, swiq seuq dawz maranz, mwh aeu aencaengq naengj haeuxnaengj, cuengq gaem haeuxbongz haenx youq baihgwnz haeuxnaengj naengj cug, couh aeu gijneix dangq haeuxmoq gwn. Yaek gwn haeuxromh, daengx ranz vunz humx youq henz aensaeuq gingq caeq goengcoj le cij caez gwn haeuxmoq. Ngoenzneix, gak ranz cungj cingj gij caencik baengzyoux mbanj wnq daeuj doengzcaez angq gvaq ngoenzciet, ranzranz gaj gaeq gaj bit, dwkbya lauz gungq, mbangj lij gaj mou gaj vaiz loengh byaek nda daiz, ranzranz vunz naengh ndaetfwd, gangjgoj gangjriu, nauhyied raixcaix.

Youq ndwencieng roxnaeuz banh gij hozdung hung wnq, gyoengq beixnuengx Myauzcuz cungj yaek boq venz caijdangz angq hoh, hoengq daj ndwenngeih cinsix daengz ciet- haeuxmoq geizgan, vih comz rengz guh ndaemganq, couh gimq boq venz caijdangz, daengz ngoenzciet ndwenloeg coloeg ciethaeuxmoq le, mbanjmbanj cij youh miz sing venz yiengj gyukgyadgyad. Ngoenzciet itbuen gvaq ngoenz daengz sam ngoenz, ndaw ciet geizgan cawz boq venz caijdangz daengj hozdung le, lij miz maxdoxdik、vaizdoxdaemj、max buetvaiq doxbeij、roegdoxdoj、doiq- fwen、bengcag、youzraemx、vwnzyi yienjok、doxdax dwk lanzgiuz daengj lai cungj lai yiengh hozdung dem, nauhyied hoenghhwd.