□ Luz Gyangz Suswngh ingj Sinhyungz hoiz

“Cietdakbuh” dwg ngoenzciet conzdungj hoenghhwd gyoengq beix- nuengx Yauznding Mbanjginhgwngh ranghdieg gingjgih nazmbaeklae Lungzciz Lungzswng Gak Cuz Swciyen, moix bi liggaeuq ndwenloeg coloeg hoengh banh, gij hoengh de caenh beij ndwencieng iq di. Ngoenz ciet angqyangz neix, gyoengq beixnuengx Yauznding gak ranz cungj dawz gij buhvaq、vunjva、doxgaiq cangndang okdaeuj dak ndit, lij banh gij hozdung angqhoh gig miz daegsaek minzcuz dangdieg haenx, ndaw mbanj sing loxlez sing gyong coux hek yiengj mbouj dingz, sing go sing fwen sepset rwenzred, gyoengq mbauqsau diuq foux yegyeg, gizgiz cungj angqyangz hoenghhwd, yinx gyoengqhek gak dieg caenx haeuj mbanj humx yawj.

“Cietdakbuh” Yauznding Ginh- gwngh gaenq miz geij bak bi lizsij, riuznaeuz gij ndit ngoenz liggaeuq ndwenloeg coloeg mied doeg gaj nengz ceiq ak, doxgaiq dak ndit le mbouj hwnj mwt, non mbouj dwk, lij ndaej dak seuq gij heiq mbouj gitleih haenx. Ngoenz neix, gyoengq meh- mbwk Yauznding gak ranz gak hoh cungj dawz gij buhva、buhcangndang、vunjva ndaw loengx okdaeuj dak, gwnz faexsaux、laj yiemhranz gak ranz baenz roix baenz coij buh vunj ndingnding loegloeg lwenqyab yapda, “cietdakbuh” couh baenzneix heuh roengzdaeuj. Gyoengq beixnuengx Yauznding daengx mbanj ranzranz cungj gaj bit gaj gaeq、suek faengx、guh ceizndek, hek daengz ndaetfwd nauhyied dangqmaz, gij lwgmbwk haq okbae caeuq boux daeglwg coemq bae mbanj wnq haenx, cungj rap duzbit、laeujhaeux caeuq huqlaex, aemq lwgnyez ma ranzmeh doxcomz gwnngaiz. Ngoenz neix, gyoengq cunhminz ram duzmagim riengzlaeng goengsae, byaij bae gak ranz gak hoh guh caeqbaiq mbaenj fuk. Cungqgyang ndaw mbanj cix gaqdap ndei aen daizheiq, vunzlai gak mbanj doxlwnz hwnj daiz yienj go foux conzdungj, cezmuz lai cungj lai yiengh, ndei yawj raixcaix. Ndaw mbanj lij banh gak cungj gak yiengh guhhong doxdax, miz daemhaeux、gawqfaex、dozmae、daemjbaengz、baenqvax、labnyumx、confaex gvaekrin diemjfeiz daengj doxdax; lij miz aen hozdung cien vunz coux moq、 mehmbwk Yauznding youq henz dah fou gyaeuj roi byoem, fungcingz Yauzcuz lai cungj lai yiengh, hawj gyoengqhek yawj mbouj gib bae; fouxgyongraez、fouxfaexsaux、eu fwen doiq fwen daengj go foux daegsaek hawj gyoengqhek roxyiuj gij vwnzva swnghhoz lai cungj lai yiengh beixnuengx Yauznding; siuqva daemjbaengz、san haizcauj daengj dinfwngz biujyienj baijyienj le gij cingsaenz mehmbwk lwgsau Yauznding vunz gvai fwngz soem、vunz gaenxgyaek gwn ndaej hoj. Doengxngoenz angqyangz hoengh- hwd, doengxhaemh cix engq nauhyied, gyoengq vunzlai Yauznding fwngz yaengx bogfeiz youq gwnz haenznaz Nazmbaeklae Lungzciz byaij dwk, geij cien gaem bogfeiz gyoebbaenz duzlungz、duzfungh youq doenghnaz doengh- yabyab, ndei yawj raixcaix, hawj Mbanjyauz youq ndaw doengx- haemh laepsaengsaeng haenx dem le faenh gingjsaek maezvunz ndeu.