Ngoenz singhgiz banringz, Vangz gizcangj caeuq lauj Gyangh youq ndaw gunghyenz dwk geiz. Cingq dwk ndaej mizyinx seiz, sawqmwh cienz daeuj singheuh “lwgguk, lwgguk……”, song boux de cungj ndaejyi, hoeng, gyoengqde mbouj leixlangh, aenvih singheuh “lwgguk” neix caeuq gyoengqde mboujmiz gvanheih.

“Lwgguk, lwgguk……” Sing- hemq beij haxbaenh hung, boux hemq haenx daeuj daengz henzndang songde dem. Vangz gizcangj caeuq lauj Gyangh ngiengx gyaeuj hwnjdaeuj, bouxsai noh ndaemnding、din fwngz coyadyad ndeu, cingq gikdoengh dwk yawj coh Vangz gizcangj.

“Lwgguk, mwngz mbouj rox gou la? Gou dwg Daegrin.”

“Aeyu, dwg Daegrin ha, mwngz baenzlawz youq gizneix ne?” Vangz gizcangj seizneix ngamq siengj ndaej daengz “lwgguk” couh dwg aen coh iq de, lizhai ranzcoj samcib bi lo, mbouj caiq dingqyi miz vunz heuh aen coh neix, yaepndeu singj mbouj gvaq daeuj.

“Gou soengq lwg daeuj ndaw swngj doeg daihhag, mbouj siengj daengz youq gizneix ndaejraen mwngz.” Daegrin angq dwk naeuz.

“Goengheij! Ndaw mbanj raeuz ok vunzcaiz ha.” Vangz gizcangj youh angq dwk gaisau hawj lauj Gyangh naeuz: “Boux neix dwg bouxdoih mwh iq gou.”

Daegrin caeuq lauj Gyangh dox ngaek gyaeuj riunyumnyum.

Vangz gizcangj angq lai, rag Daegrin haeuj ranz de bae.

Vangz gizcangj din ngamq yamq haeuj dou couh hemq:“Mehyah, miz hekmoq daeuj bw, mwngz yawj, bouxdoih mwh iq gou, mwhde song dou yaek caemh daenj geu vaq ndeu ne.”

Mehyah Vangz gizcangj ndat- cingz dwk heuh Daegrin naengh daengq, gingq caz hawj de.

Vangz gizcangj youh hemq: “Mehnax, mehnax”. Mehsimj ndeu daj ndaw ranzdajcawj okdaeuj, Vangz gizcangj naeuz: “Hekmoq daeuj, bae cawx di byaek ndei ma, dou yaek yet di laeuj.” Mehsimj cam：“Ndei, cawx byaek gij maz ne?”

“Cawx duz gaeq he.”Vangz gizcangj gangj sat couh ae mbat he, youh naeuz：“Song duzfw, duz gaen lai doxhwnj bw.” Gangj sat youh ae mbat he, youh diemj duzbaeu、duzgungq、nohyiengz、nohcawz……moix diemj sat yiengh ndeu couh ae mbat ndeu.

Daegrin muengz lanz naeuz: “Mbouj yungh cawx baenzlai byaek, duix souh ndeu, vanj byaeksoemj ndeu couh ndaej lo.”

“Vangz gizcangj, mwngz yawj?” Mehsimj veiznanz dwk yawjyawj Vangz gizcangj.

“Daegrin mbouj dwg boux wnq, caiq cawx di nohcing daeuhfouh byaekheu couh baenz lo.” Vangz gizcangj caiq diemj geij yiengh byaek neix, mbouj caiq ae lo, de vad fwngz naeuz, “seizgan mbouj caeux lo, vaiq di bae cawx.”

Mehsimj muengz bae haw lo.

Vangz gizcangj caeuq Daegrin gangjgoj, Vangz gizcangj naeuz: “Caen dwg ndwenngoenz mbouj caj vunz ha, raeuz cungj geq lo, danghnaeuz ngoenzneix mwngz mbouj haeuj singz daeuj, mbouj rox ngoenz lawz raeuz cij ndaej doxraen.”

“Dwg ha, raeuz bouxboux nyaengq. Gou hix ngeix mbouj daengz ngoenzneix raeuz ndaej doxbungz.”Daegrin naeuz.

Songde cingq gangj ndaej haisim, mehsimj cawx byaek dauqma lo, mehsimj naeuz, bae haemh lo, mboujmiz byaek wnq gai, cij cawx ndaej nohcing、daeuhfouh caeuq byaekheu ma.

Vangz gizcangj raen le, mbouj angq dwk gvaiq mehsimj.

“Baenz lo, raeuz nienzgeij neix gwn noh lai doiq ndangdaej mbouj ndei.” Daegrin naeuz.

Donq haeux neix, yienznaeuz haeux byaek bingzciengz, laeuj dwg laeuj doj, hoeng, songde gwn ndaej gig haisim.

Ngoenz daihngeih,Vangz gizcangj youq gwnz haw raen Lij gizcangj. Vangz gizcangj cingj Lij gizcangj daeuj ranz gwnhaeux.

Vangz gizcangj yamq haeuj dou ranz couh hemq：“Mehyah, mehyah, miz hek daeuj bw.”

Mehyah ndatcingz dwk heuh Lij gizcangj naengh daengq, lij dauj caz hawj dem.（caengz sat）