□ Veiz Yungj Mung Lingz ingj Sinhyungz hoiz

Moix bi liggaeuq ndwenngux ngeihgouj, gyoengq beixnuengx Yauzcuz Sanglinz Yen Cinhih Yauzcuz Yangh cungj angqyangz hoenghhwd gvaq ngoenzciet conzdungj bibi cungj gvaq mbat ndeu —“cietdaznuj”. Ngoenz neix, gyoengq beixnuengx Yauzcuz dangdieg ranzranz cungj gaj moux gaj yiengz, loengh byaek nda daiz, daengx ranz vunz doxcomz, caeuq bouxhek gwnlaeuj, ndaek vanj ndaek vanj ndoet laeuj, ndaek gaem ndaek gaem gwn noh, caeuq gyoengq bouxhek daeuj angh hoh haenx ciengq go eu fwen diuq foux, baijyienj fungsug conzdungj geizheih bonj minzcuz, hoenghhwd nauhyied.

Riuz naeuz ciuhgonq gig nanz haenx, goengcoj Yauzcuz couh senj daengz dieg neix youq, gvaq saedceij caemdingh an’onj. Gvaqlaeng miz vunzyak aen minzcuz wnq ciemq haeuj gizneix, faenh caemdingh an’onj neix deng dwkvaih lo, Yauzvuengz cijndei daiq gyoengq beixnuengx bae laengzhoenx vunzdig. Lienzdaemh hoenx daengz liggaeuq ndwenngux ngeihgouj, Yauzvuengz cij daiq gyoengq beixnuengx ndaejhingz dauqma. Vihle angq hoh ndaejhingz, gyoengqvunz roq gyong roq laz, gaj mou gaj yiengz, ciengq go diuq foux, nauhyied raixcaix. Daj seizhaenx gvaqdaeuj, vih geiqniemh gij hozbingz caeuq andingh ndaej daeuj mbouj heih neix, beixnuengx Yauzcuz moix bi daengz ngoenz neix cungj banh gak cungj hozdung angq hoh, ciemhciemh couh baenz le cietheiq daegbied bonjfaenh—“cietdaznuj”.

Haetromh ngoenzciet, gyoengq mbauqsau Yauzcuz couh ram diuz faexsaux gak hoh con doeng coq laeujhaeux rimmwd ndeu, ndwn youq bakmbanj baizdoih dwk coux hek; baez miz hek daengz, gyoengq mbauqsau couh caeuq bouxhek diuq foux faexsaux, seiz mbouj seiz yaengx diuz faexsaux hwnjdaeuj baez baenq, laeujhaeux couh daj aencongh cuenq ndei haenx biu okdaeuj, bouxhek cijndei aeu bak bae do gwn laeuj, geij mbat roengzdaeuj, bouxhek cix gwn le haujlai laeuj. Byaij haeuj ndaw mbanj daeuj daengz diegdangz gyang mbanj, lij miz diuq fouxgyonglingz、benz laebakcax、lohdin byaij gyoqfeiz daengj lai cungj lai yiengh hozdung fungsug minzcuz biujyienj. Youq yienhciengz “byaij gyoqfeiz”, gwnz namh miz diuz luengq raez 3 mij、gvangq 0.4 mij、laeg 0.3 mij bu rim gij danq cingq coemh dwk ndongqnduq ndeu, caenhraen song boux goengsae fatgoeng loengh fap le, couh lohdin byaij gvaq gwnz gyoqfeiz, angjdin cix mbouj deng logsieng saekdi; cungqgyang giuzcangz ndaw mbanj, miz diuz ganjfaex cocat sang 8 mij ndeu daengj dwk sohsangh, gwnz ganjfaex baek le 36 fag caxgang raez, bakcax doxhwnj camca baenz mbaeklae, bouxyienj lohdin lohfwngz aemq daeh dangzbingj ndeu, din dieb bakcax fwngz fuz bakcax dwk baez yamq baez mbaek benz hwnj dingj ganjfaex, gaem aen hauhgaeuvaiz boq uu hwnjdaeuj, caiq vax gij dangzbingj ndaw daeh vanq roengzdaeuj hawj vunzlai gwn, neix heuhguh vanq “fukheiq”; riengzdwk “caijvadaeng”、fouxgyonglingz daengj go foux ndawbiengz conzdungj Yauzcuz laebdaeb hwnjdaiz lienghsiengq, gyoengq bouxyawj doq yawj doq bekfwngz doq hemq haenh ndei, yienhciengz angqyangz nauhyied.

Biujyienj hozdung guhsat le, gyoengq bouxhek byaij haeuj ranz beixnuengx Yauzcuz gwn ngaiz. Cawjranz Yauzcuz caeux gaenq loengh ndei haujlai byaek daegsaek Yauzcuz, miz nohnaengj luj mbahaeux、raemxmboq cawj nohyiengz、gaeqdoj dumq daengj. Gyoengqhek caemh haeuj mbanj ei fungsug, gaem vanj ndoet laeuj, ndaek gaemz gwn noh, angqyangz simsangj. Mwh gwn ngaiz, lij miz aen “cezmuz” daegbied vunz Yauzcuz gingq laeuj gingq noh ndeu: Aeu dawh roix 4 gaiq noh guh roix ndeu, gingq soengq daengz henz bak bouxhek, bouxhek ne cix mbouj ndaej doi, gaemz he gwn noh liux bae, yienhciengz sing bek fwngz sing hemq gyukgyad, angqyangz dangqmaz.