独具特色热烈隆重的仫佬族依饭节

□ 马志华 ingj/sij

Mulaujcuz dingzlai comz youq gih raeuz Lozcwngz Mulaujcuz Swciyen, gaxgonq saenq lai cungj saenzbaed, ngoenzciet haemq lai, ndaw bi he cawz ndwencib、ndwenit le, gizyawz moix ndwen cungj miz ngoenzciet, ndawde suenq “cietyihfan” gek sam bi hoengh banh、moix bi saeq banh mbat he haenx ceiq miz daegsaek ceiq hoenghhwd, miz gij eiqsei mbaenj saenz gyaep sez、bauj bingzan comz fukfaenh、hoh gohaeux fungsou, dwg aen cietheiq conzdungj Mulaujcuz gagmiz ndeu, daiq miz gij cingzdiuh gyo’mbaiq aencingz caeuq simmuengh haenqhwd.

Riuznaeuz ciuhgonq ranghdieg Mulaujcuz nyaenyak guhhaih youq- gaenj, daegbied dwg nyaenvuengz — saeceijsaenz engq yak lai, haih vunz gwn doenghduz, soemx gomiuz daemh reihnaz. Vunz Mulaujcuz cingq mbouj rox baenzlawz guh seiz, miz dah sau Maxhau ndeu daeuj lo, de rengz ak raixcaix, aeu naq nyingz duz saeceijsaenz dai bae, gouq le gyoengqvunz, caemhcaiq daj ndaw conghbak duz saeceijsaenz dued aeu haeuxceh dauqma hawj gyoengqvunz, lij aeu lwgbiek、lwgmaenz deu baenz duzcwz duzvaiz bang gyoengqvunz dawzcae dawzrauq, son gyoengq daegmbauq Mulaujcuz dwknyaen. Daj seizhaenx hwnj, ranghdieg Mulauj rumz dingh fwn yinz, gohaeux fungsou. Vih geiqniemh gij goenglauz sau Maxhau, moix baez roeb daengz bi’nyinh ngoenz laebdoeng gonq- laeng, vunz Mulaujcuz couh baenz mbanj roxnaeuz ndaw “doeng” (coengcug) doxcomz guh caeqbaiq, daih cienz daih baenz le “cietyihfan”.

Ngoenzciet, vunz Mulauj cungj youq baihnaj miuhcoj dap aen douhung baek rim nyefaex va- ndoeng ndeu, vunz daengx “doeng” doxcomz dwk guh gij hozdung caeqbaiq. Guh caeqbaiq gaxgonq, aeu dawz gij siengqveh 36 boux saenzbaed venj youq gwnz ciengz dingdangz miuhcoj, mauhngeg baij hwnj gwnz daiz dajcuengq bae, lij genj aeu gij riengz haeuxcid ceiq raez、naedhaeux ceiq mbot haenx yungh sailaisaek cug baenz gaem venj hwnj gwnz ciengz bae; gwnz daizhung cungqgyang dingdangz baij rim duzcwz、duzvaiz aeu lwgbiek、lwgmaenz deu baenz haenx, caiq baij haeuxnaengj haj saek dem, seiqhenz baij miz lwgraz、duhhenj、batgak、sagieng、mbawcaz daengj 12 cungj nungz canjbinj caeuq gaeq、bit、bya、simdaeuzmou、daepmou daengj 12 cungj doxgaiq dajcuengq, aeu neix daeuj byaujsi loeg cuk hwngvuengh、nungz yiz muz fuyez fungsou, mbouj lumz aencingz saenzbaed goengdaek goengcoj. Cietgingq hozdung miz cingjswng、diemjseng、yienqswng、ciengq saenz、habbing、soengqswng daengj cwngzsi, daengx aen yizsi youz song boux saegoeng guh swhyi, boux he gyaeuj daep mauhngeg, ndang daenj buhfap nding, din daenj haizcauj, cienmonz diuq foux cingj saenz gingq saenz, heuhguh “saegoengdiuq”, lingh boux saegoeng daenj buh bingzciengz, cienmonz ngonciengq gij gingfaenz cingj saenz gingq saenz, heuhguh “saegoengciengq”. Yizsi caeq saenz sat le dawz yienghvunq duzcwz duzvaiz caeuq riengzhaeux faen hawj gak ranz baema dajcuengq siuyieng, sojmiz vunz ndaw coengcug itheij gwnngaiz、ciengq go、yienjheiq、foux lungz foux saeceij. Gak mbanj gak ranz, bouxhek lai raeuh, gyoengq caencik baengzyoux nem beixnuengx minzcuz wnq geijcib leix gyae haenx caemh foenfoen ganj daeuj angq hoh, camgya gij hozdung ngoenzciet, ndaw mbanj nauhyied raixcaix, angq nauh geij ngoenz geij hwnz, doengzcaez angq hoh fungsou bingzan, maq- muengh guek ak maenz fouq、saedceij vuenyungz.