粽香满城龙舟竞渡的龙州县端午节

□ Causinh Youjcaiz ingj Sinhyungz hoiz

Angq hoh cietduenngux, ruz- lungz beij vad vaiq. Ndawbiengz Yienh Lungzcouh fungsug sibgvenq gvaq cietduenngux hwnghoengh, moix bi mboengq ndwenngux co’ngux, vunzlai cungj gag doxiu doxcomz dwk banh ruzlungz beij vad vaiq, suek faengxraemxdaeuh daengx ranz vunz gwn, ngoenzciet hoenghhwd vunzlai angqyangz.

Ngoenz duenngux, Yienh Lungz- couh ndawsingz lajmbanj ranzranz cungj baek nyego’ngaih、varuzlungz daengj hwnj gwnz douhung bae; vunzhung lij raek aen bauhom aeu vaj caeuq sienq lai saek neuj baenz haenx hwnj najaek lwgnyez, yungh daeuj fuengzre binghdwgliengz riuzhengz. Cawz gij fungsug conzdungj neix le, vunz Lungzcouh gvaq cietduenngux, ceiq maqmuengh caemhcaiq ceiq haengj guh haenx dwg bae Sangginh Yangh yawj ruzlungz doxdax lo.

Sangginh Yangh dwg aen mbanjraemx mizmingz ndeu, Dahcoj- gyangh con lae gvaq ndaw yangh, moix bi cietduenngux, Cunh Songhamq caeuq Mbanjhozbau Cunh Cunghsanh cungj faenbied banh ruzlungz doxdax, hawj cietduenngux henzguek dem le haujlai nauhyied caeuq angqyangz.

Ngoenz cietduenngux haetromh, saisai mbwkmbwk、lauxlaux nyaeq- nyaeq, cangndang gyaeuget lai saek lai yiengh, baenz bang baenz doih angqvauvau dwk foedfoed nangh- nangh caenx daengz song hamq dah Dahcojgyangh rangh Sangginh Yangh, caenh raen song haenzdah vunz cien vunz fanh, miz ndwn miz maeuq miz naengh, mbangj lwgnyez caeuq daegmbauq lij benz hwnj gwnz go faex hung henz dah, daj gwnz sang yawj coh gwnz dah. Ndaw dah miz geijcib aen ruzlungz raezrengh gaebged haenx aen nem aen baiz dwk cajdeq roengzlingh. Sing sauq baez yiengj geiznding baez vad, ruzlungz couh lumj diuznaq nyingz okbae nei, ciengj gonq lau laeng dwk bonghvaij baenaj. Bouxvadruz riengz sing laz vaiqmenh haenqrengz yinzred vad ruz, song mbiengj ruz diemjraemx sinz mbin, bouxvadruz loq raen loq mbouj raen, lumj maxbang bonghbuet; bouxroqlaz cix engq angq raeuh, fwngzswix riuj laz fwngzgvaz gaem faexroq caenhrengz roq laz, caenh siengj roq ndaej vaiq di bouxvadruz vad ndaej vaiq di rengz di. Gyoengqvunz gwnz haenzdah engq sim’angq, haenqrengz bekfwngz ha hemqswenj ha, bang aen ruzlungz ndaw mbanj、diuzgai bonjfaenh gyayouz, gij yienghsiengq de couh lumj gyoengq bouxcoz ndiepgyaez boux mingzsingh nei, bek dwk fwngz byangj hemq dwk hoz hep liux lij mbouj nyienh dingz roengzdaeuj, sing gyukgyadgyad lumj byajraez hongxhap, ciengzmienh nauhyied hoenghhwd.

Ngoenz cietduenngux, Sangginh Yangh cawz banh vad ruzlungz doxdax le, ndaw mbanj lij cingj canghfwen daeuj doiq fwen, yinx gyoengqvunz gyaez fwen daegbied gyoengq vunzlaux humx yawj, canghfwen mwngz eu gou doiq, mwngz coenz gou hot, raen maz eu maz, hopheux gij vunz gij saeh ndaw mbanj caenhcingz doiq fwen, hawj vunzlai dingq dwk dawz sim dawz hoz, bek fwngz angq riu, angqyangz dangqmaz.