瑶族同胞古老的传统节日——“禁风节”

□ Moz Hijswngh ingj Sinhyungz hoiz

Youq ndaw luegbya baihbaek gih raeuz, gyoengq beixnuengx Yauzcuz ranghdieg Linzgvei Yen Vanjdenz Yauzcuz Yangh, gyaez eu fwen haengj diuq foux, baengh gij coengmingz caeuq goengrengz bonjfaenh gaenxgyaek guhhong hwngfat daih dem daih. Moix bi liggaeuq ndwencieng ngeihcib gonqlaeng 3 ngoenz seizgan, gyoengqde cungj angqyangz gvaq aen cietheiq conzdungj lizsij gyaenanz ndeu — “cietgimqrumz”. Ngoenzciet, gyoengqde lauxnyaeq cungj cangndang moqsupsup gak saek gak yiengh lwenqyebyeb, riengz bouxsaefap、goengsae caeuq laexseng hoenghhwd guh aen yizsi hoiz “nyienh Buenzvuengz” , satle couh angqyangz dwk roq gyonglaz foux saeceij, diuq foux gyongraez, doiq fwen yienj heiqcaijdiu, diuq fouxsaux bin laebakcax, cawx hongdawz caeuq ndangdaenj, dawz faenh sim’angq habhoz saedceij ndei ngoenzneix baij youq gwnz naj, doengzseiz mbaenj ndaw bi moq rumz dingh fwn yinz, gohaeux fungsou doenghduz maj vaiq.

“Cietgimqrumz” gaenq riuzcienz haujlai nanz, riuz naeuz goengcoj Yauzcuz aenvih hoenxciengq biengz luenh cix deuznanh daengz gij yienh diegbya baihbaek Guengjsae, vih mbouj nyex goengmbwn Yidi ndatheiq bongj rumzlaux coq caihux, ndigah ngoenz ndwencieng ngeihcib ndaw ranz mbouj ndaej loengh miz sing okdaeuj, mbouj cinj daem haeux、bag fwnz daengj. Yaek gimq rumz gimq sing, ceiq ndei byaij ok Mbanjyauz, bae gij mbanj aen minzcuz beixnuengx wnq youq haenx youq saek ngoenz, swnhbienh bae liebyawj caencik baengzyoux guh di gaicawx. Gaimiuhbingz ndaw Yangh Vanjdenz dwg gyoengq Beixnuengx Gun、Cuengh、Myauz comzyouq, mbouj miz vunz Yauzcuz, gizneix mbouj gimq rumz gimq sing, gwnzhaw doxgaiq lai gaicawx hoengh, lij ndaej gangjgangj riuriu, eu fwen diuq foux. Baenzneix, gyoengq beixnuengx Yauzcuz couh youq ngoenz ndwencieng ngeihcib haetromh daeuj daengz Gaimiuhbingz, comz dwk roq gyonglaz foux saeceij, doiq fwen diuq foux, gawq ndaej caenhcingz angqyangz youh mbouj daekcoih rumzsaenz, nanz le couh baenz aen cietheiq “cietgimqrumz” neix lo. Couh yienghneix, geij bak bi daeuj “cietgimqrumz” Yauzcuz cungj dwg youq Gaimiuhbingz hoengh banh, moix bi ndwencieng ngoenz ngeihcib, gij gai gaebged Gaimiuhbingz cungj vunz cien vunz fanh, vunz bae vunz dauq, caenx dwk ndaetfwdfwd, cawz gyoengq beixnuengx Yauzcuz ndaw gvaengh geijcib baenz bak leix haenx caez ganj daeuj gvaq ciet youzcet le, lij miz beixnuengx Yauzcuz ranghdieg Lingzconh、Lungzswng、Yungjfuz daengj yienh nem Huznanz、Gveicouh daengj swngj haenx daeuj dem, nauhyied dangqmaz.

Seizneix, “cietgimqrumz” Vanjdenz Yauzyangh yienznaeuz lij ciuq gij yiengh conzdungj ciuhgonq banh, youz ndawbiengz gag doxiu banh gagnyienh camgya, lij iu gyoengq beixnuengx Gun Cuengh Myauz daengj minzcuz beixnuengx ranghdieg neix camgya dem. Gyoengq beixnuengx Yauzcuz leihyungh aen gihvei ndei neix liebyawj caencik baengzyoux, yawjngonz hag aeu gij gingniemh dajndaem dajciengx caeuq fuengsik gvaq saedceij beixnuengx Gun Cuengh Myauz daengj minzcuz; gyoengq beixnuengx Gun Cuengh Myauz caemh cawx aeu gij huqdoj huqcwx gyoengq beixnuengx Yauzcuz daiq daeuj haenx, hag gij gisuz dwknyaen caeuq seujsiuq daengj dinfwngz maenhndei gyoengq beixnuengx Yauzcuz; gyoengq mbauqsau cix swnh ngoenzciet hoenghhwd ra youx gyau youx, yienh’ok doenghyiengh minzcuz doxgiet doxhuz caemhyouq haenx.