热闹非凡的福利“五月八” 民俗节

□Luz Dai Dangz Yingh ingj Sinhyungz hoiz

Moix bi liggaeuq ndwenngux cobet, gih raeuz Gveilinz Si Yangzsoz Yen Fuzli Cin gak cuz beixnuengx cungj angqvauvau doxcomz dwk gvaq aen cietheiq vwnzva fungsug minzcuz “haj nyied bet” neix, vunzlai gag ok ngaenz youq gwnzhaw banh vwnzyi ndawbiengz、dijyuz doxdax caeuq caeqbaiq hozdung, daj aen dijyuzcangz daengz gaigeq, vunz baebae dauqdauq caenx ndaetfwdfwd, sing gyong sing laz yiengj dungdang gyukgyad, gyonghwet angqyangz、lungzdaengqraez geizheih daeg- bied、ruzmboek miz yiengh ciuhgeq、foux lungz foux saeceij haenqhwd……hawj gyoengq hekyouz daj ndaw guek rog guek daeuj haenx yawj mbouj rox gaeuq、angq dwk mbouj sij dauqranz.

Hawgeq Fuzli ndaej heuhguh “aenmbanj yisuz ndawbiengz daengx guek” caeuq “aencin daihdaeuz vehbeiz Cungguek”, youq baihdoeng Yangzsoz Yen, Dahlizgyangh gyaeundei con gvaq cungqgyang gwnzhaw. Aen Miuhmehcoj gizneix, dwg aen miuhgeq dog rangh Dahlizgyangh louz ndaej ndei ndeu, moix ngoenz cungj miz haujlai hekyouz ndaw guek rog guek bae cetyouz. Ciuq vunzlaux dangdieg lwnh naeuz, “haj nyied bet” hoihgeiz Gaifuzli daj Ciuhcingh satbyai couh hainduj banh lo, seizhaenx banh hoihgeiz hozdung dwg vihle yinx boux guh seng’eiq bae Fuzli Cin guh gaicawx、dajbuenq, hoenghvuengh haw Fuzli. Gvaq- laeng vih hawj aen hoihgeiz neix miz vunz guhdaeuz dajleix comz vunz, vunzlai couh doxyaeng gvidingh, bi haenx ranz lawz seng lwgnding, couh okdaeuj guhdaeuz banh aen hoihgeiz neix, ndigah aen ciet “haj nyied bet” neix gaxgonq caemh heuhguh “cietlwgnding”. Vihle louz bouxseng’eiq lai youq geij ngoenz, vunz Fuzli lij youq henz Dahlizgyangh guh le Miuhmehcoj (Denhhougungh), hawj gyoengq- vunz mbaenj fuk、yawj gingj. Moix bi baez daengz “haj nyied bet” hoihgeiz, vunz Fuzli cungj banh caeqbaiq miuhcoj、foux lungz foux saeceij、yienj heiq, daengx ranz vunz doxcomz gwn ngaiz, beij gvaq cieng lij nauhyied.

Ngoenz “haj nyied bet”, gwnzhaw Fuzli ranzranz cungj guh aen daeng’va ndwndaengj sam cik roek sang ndeu, dawz bae baihnaj miuh daxgoeng、daxbuz coemh, riengzlaeng caeqbaiq bak lai aen you buzsat caemhcaiq ram dwk、umj dwk bae gwnz gai youzbyaij; foux saeceij、loengh daengbaiz、byaij maxfaex、bet sien ceij guh、bungzgyonglaz、daizgojgaeq、ruz- mboek daengj aendoih vwnzyi caeuq dijyuz riengzlaeng youz- byaij, seizneix gwnz gai vunz caenx ndaetfwd, sing gangj sing ciengq gyukgyad, gyonglaz yiengj dungdung dangdang, ciengz- mienh hungloet hoenghhwd. Youzbyaij sat le couh yienj Heiqgvei ciengq go eu fwen, guh dwkgiuz dwkgeiz doxdax daengj hozdung, gaicawx hix caemh guh ndaej nauhnauh yiedyied. Ngoenz cietheiq, vunz dangdieg ranzranz cungj aeu nohcing guh “sam nyemh”, couhdwg nyemh lwggwz、nyemh lwgmanh、nyemh lwghaemz guh cungj byaek noix mbouj ndaej ndeu daeuj daih hek, hawj beixnuengx ndaw ranz caeuq caencik baengzyoux angqyangz gvaq ciet.