Haeuj daengz laebcou yienz- naeuz suenq dwg yamq haeuj seizcou lo, hoeng, ngamq hainduj haeuj laebcou duenh seizgan ndeu mbwn lij haemq ndat, hoengheiq mbaeqdoh lij haemq daih, vunz- raeuz caengz gamjdaengz raen liengz saek di, dauqfanj gamj- daengz gig oemndat. Caiq gyahwnj vunzraeuz youq ndaw ciet seizhah gwn huqgyoet lai, goengnaengz aendungx gemjnyieg lo, dangh- naeuz daihliengh gwn huqbouj, daegbied dwg gwn gijgwn nywnx caeuq ciengx yaem daiq lai, rox gyanaek fudanh aendungx, dungxsaej ciengzgeiz cawqyouq “hawnyieg” yienghsiengq, yaepseiz souh mbouj ndaej, couh yinxhwnj siuvaq goengnaengz ok luenh. Ndigah, seizcou gwn bouj wng habdangq gwn di gijgwn roxnaeuz gij yw cangq mamx、siu ndat、leih caep haenx, mboujfuengz lai gwn di gijgwn lumj cuk duhheu、cuk mbawngaeux、cuk lwglimz、cuk makcauj cehmbu、cuk maenzcienz daengj.

Vih yawhfuengz seizcou hawq- sauj, ndaej habdangq gwn di lwgmak ndeu, ndawde daih’it sien senj gwn makleiz caeuq oij, daihngeih dwg lwgcid、gyoijhom、makbizbaz. Danhfanz boux mamx haw caep naek siq lai, boux bwt caep baenzae youh myaiz niu cix mbouj hab gwn gij lwgmak neix.

Aeu daezsingj daihgya dwg, seizcou gwn bouj wng cit bouj bingz bouj guhcawj. Boux baenz yiengz haw mbouj ndaej gwn gijgwn roxnaeuz yw raeujndat, lumj noh- yiengz、nohma、yinzsinh、loegyungz、naenggo’gviq, mboujnex gig yungz- heih gyanaek hawqsauj. Linghvaih, seizcou gwn bouj aeu yawj vunz bae gwn, boux baenz ndang haw caeuq boux baenz binghmenhsingq, ceiq ndei youq canghyw cijdauj lajde bae gwn bouj.