展示民族风俗的资源“七月半”河灯歌节

□Yenz Swhyen ingj Sinhyungz hoiz

“Caet nyied buenq” ciet daengdah eu fwen dwg gih raeuz Swhyenz Yen ngoenzciet conzdungj fungsug minzcuz ndawbiengz moix bi gvaq baez he. Moix bi liggaeuq ndwencaet cibseiq gonqlaeng, dangdieg Gun、Myauz、Yauz daengj minzcuz beixnuengx aeu cungj hingzsik cuengq daengdah ciengq go eu fwen daeuj dakcienz gij simcingz niemhngeix vunzcaen gaenq gvaqseiq 、siu cai veq hux haenx. Eu fwen doxdax、fanh aen daengdah yaepyeb vaij bae、yienj go foux vwnzyi ndawbiengz、dijyuz daegsaek minzcuz hozdung、huqdoj dangdieg baijgai daengj hozdung cietgingq lai cungj lai yiengh, hawj gyoengq hekyouz ndaej yawj mbat gaeuq fungcingz fungsug diegbya baihbaek Gveilinz Si ndeu.

Ciet “caet nyied buenq” lizsij gyaenanz, Ciuhdangz couh miz cungj fungsug youq moix bi liggaeuq ndwencaet cibseiq gonqlaeng cuengq daengdah dajcaeq mbaenj fuk、rouhhoenz ligdaih cojgoeng caeuq doenghboux cengjruz、cuengqbaiz doekraemx dai haenx, gaxgonq caemh heuhguh “cietcungyienz”、“cietfangz”、“ciet caet nyied buenq”. Moix bi daengz ciet, vunz dangdieg couh gak ranz gag guh gij daengdah yiengh lumj lungzfungh bouxsien、doenghduz gova、gak cungj gohaeux daengj bae daengz henz dah, doq ciengq go doq cuengq daeng, niemhngeix vunzcaen ciuhgonq, mbaenj vunz ndaw ranz ndangcangq bingzan. Ndaw cietheiq, cawz ciengq go eu fwen cuengq daeng le, lij guh dingj faexsaux、foux saeceij foux lungz、“duzciengh” bengcag、gaeq doxdoj、yiengz doxdaemj daengj gak cungj dijyuz、 guh’angq ndawbiengz hozdung; doengzseiz caemh baijgai huqdoj dangdieg、gijgwn ndawbiengz dem, daengx aen yienhsingz sing go sing fwen haprwenz, nauhyied gyukgyad hoenghhwd. Haujlai hekyouz caemh angqyangz bae gvaq ciet, benz bya biu ruz, yawj gingj caemz va, youz gaeuq le dauqma ndaw yienhsingz cawx huqdoj dangdieg cimz gwn gijgwn haekfeih miz daegsaek minzcuz dangdieg, yawj ciengq go eu fwen doxdax, hix angqvauvau dwk cawx saek aen daengdah bae henz dah cuengq. Doengxhaemh youq ndaw sing go sing fwen haprwenz gyukgyad, cuengq daeng yawj daeng, aen gingj vunzraeuz caenx ndaet song hamq dah, cienfanh aen daeng ronghyebyeb ingj rongh Dahswh- gyangh haenx hawj vunz sim’angq gikdoengh, mbouj sij dauqma.