□ Lij Cinghsiz/李青识

Nanzningz Si Cinghsiu Gih Cangzdangz Cunghsinh Siujyoz gig yawjnaek hong hagdangz hozdung, gingciengz guh gak cungj gak yiengh hozdung mizik, sawj gyoengq hagseng youq dwzyuz、 ciyuz、 dijyuz daengj geij fuengmienh cungj ndaej fazcanj.

Youq gwnz aen hoih haihag haggeiz neix, hagdangz guh “mbaet gwn mbaet yungh, daj saeh henzndang guhhwnj” hozdung, sawj gyoengq hagseng daj iq hag baenz mbaet gwn mbaet yungh sibgvenq ndei.

Moix bi daengz 3 nyied 5 hauh, hagdangz cungj guh “hag Leiz Fungh” hozdung, Doenggvaq guh saehndei、 gienngaenz、sij banjbauq、yawj denyingj Leiz Fungh、ciengq go Leiz Fungh 、doeg saw《Ngoenzgeiq Leiz Fungh》、gangj gojgaeq Leiz Fungh daengj gij hingzsik neix daeuj senhconz Leiz Fungh cingsaenz, sawj Leiz Fungh cingsaenz haeuj ndawsim moix boux hagseng bae, youq ndaw hagdangz yaprongh.

Hagdangz yangjying aen haucau “seuqcingh lajmbanj, mbanjranz gyaeundei”, cujciz gyoengq hagseng yungh dangzguhhong baet nyapnyaj gvak gohaz ndaw hagdangz, sawj ndaw hagdangz bienq ndaej cingjcaez seuqsak, gyaeundei dangqmaz.

Vihliux hawj gyoengq hagseng gvaq aen gyajgeiz ancienz、vwnzmingz、vaiqvued ndeu, 7 nyied 4 hauh, youq hai hoih cuengqgyaj ngoenzde, hagdangz gawjhengz le aen hozdung aeu “gyaez sengmingh, ancienz buenx henz ndang”guh cawjdaez ndeu, Lij Cinghsiz fuyaucangj youq gwnz hoih daegbied giengzdiuh ancienz vwndiz, iugouz gyoengq doengzhag aeu haeujsim re doekraemx、re feiz、re dienh, rox baujhoh swhgeij.