充满浪漫色彩的哈尼族“六月节”

□Veihniz ingj Sinhyungz hoiz

“Cietloegnyied” Vahhahniz heuhguh ciet “guzcahcah”, dwg beixnuengx Hahnizcuz ngoenzciet conzdungj hoenghhwd ndeu, itbuen youq liggaeuq ndwenloeg ngeihseiq gonqlaeng gawjhengz, seizgan sam daengz roek ngoenz. Ndaw cietheiq, ranghdieg Hahnizcuz mbanjmbanj gaj vaiz caeqcuengq “ranzcou”, gyaep fangz cawz sez, baujyouh vunzmbanj bingzan, doenghduz sanj lai; beixnuengx Hahnizcuz cix cangndang gyaeuget saek buh lai cungj lai yiengh, guhdoih comz daengz gizdieg cienqndiengqnged, angqvauvau dwk cienqndiengqnged、bi buengqyed、 doxbeg, bae cunz mbanj diuq fouxgyong, daihgya ciengq ha diuq ha, doenghdieg mbanjbya Hahniz dauqcawq gyukgyad nauhyied, angqyangz hoenghhwd.

Ciuq goj ndawbiengz Hahnizcuz riuzcienz, mwh ciuhnduj Hahnizcuz aeueiq boux “goengsaenz” mingzcoh heuhguh Veihgij ndeu, moix bi ndwenngux、ndwenloeg de cungj bae gak aen mbanjbya cunzyawj, yawjyawj vunzraeuz、doenghduz caeuq gomiuz, soengq angqyangz vuenyungz hawj gyoengqvunz; vihle yienj faenhsim caensim aeueiq Veihgij, gyoengqvunz Hahniz gwed gyaqbuengqyed, hawj de dangguh “maxhau” gwih, lij mbaet aeu nyecoengz、nywjheu、byaekcwx daengj, loengh daiz byaek lai yiengh youh haekfeih ndeu caeuq bwh ndei nywjmax, angq coux de haeuj mbanj, youhcaiq gaqdoq aen “cienqndiengqnged” baenqlulu haenx, gyaep fangz cawz sez, baujhoh mbanjbya an’onj. Couh baenzneix daih dem daih cienz roengzdaeuj, menhmenh bienqbaenz le ngoenzciet beixnuengx Hahnizcuz.

Cietheiq geizgan, gyoengqvunz Hahnizcuz cungj gak youq gyaeujmbanj roxnaeuz gyangmbanj gaq cienqndiengqnged、gyonghung、buengqyed hwnjdaeuj, lij coih baet ranzsaenz, gaj vaiz caeqbaiq; ranzranz naengj haeuxnaengj, daem ceizndek, gwn laeujrekoemq. Gyoengq mbauqsau cix daenj dwk moqsaksak vava loegloeg, baenz bang baenz doih comz daengz gizdieg cienqndiengqnged, doxlwnz doxdax cienqndiengqnged、bi buengqyed, ndaek yienz boq dig、ciengq go diuq foux, sing gyong、sing bekfwngz、sing yienz sing dig caeuq sing hemqswenj gyukgyadgyad haprwenz doh byonghmbwn gwnz mbanj, gij heiq gvaq ciet naekgywggywg hoenghhwdhwd .