Gaijgwz hailangh daeuj

Dangj vix raeuz loh gvangq

Daih gensez lajmbanj

Haenq yamqdin mbouj dingz

Lai bi neix gvaqdaeuj

Baihgwnz caeux roengzngaenz

Dienh raemx loh doeng daengz

Ranzmbanj yiengh bienq gyaeu

Guh gaijcau ranzyiemj

Ranznamh bienq ranzlaeuz

Baengh baihgwnz bangbouj

Ranzlaeuz baiz ladlad

Guh bingzcwngj dujdi

Naz iq bienq naz hung

Fouz giz bo giz gumz

Mizleih yungh gihgai

Banh miz sinh nungz hoz

Baenzbingh goj mbouj you

Bingh naek naeuz bingh mbaeu

Mbouj caiq you caiq heiq

Bouxlaux loegcib daengz

Couh miz ngaenzciengxlaux

Doengh boux gwn vujbauj

Nienzlaux engq vuenyungz

Ndaem naz ndi aeu liengz

Lij hawj cienz doxdauq

Boux cawjnaz swngzbau

Bi cix dauq lingx cienz

Ci baedauq hwnjroengz

Gyaudoeng gig fuengbienh

Gihgaiva saedyienh

Gaijbienq hong reihnaz

Caerauq ndi yungh vaiz

Ndaemndai ndi gungj hwet

Mbouj caiq mbaq rap gwed

Hwet mbouj in mbouj goz

Ranz geij aen densi

Soujgih vunzvunz miz

Rox gak hangz sinsiz

Yawj gisieng ganj hong

Ranzranz miz caujgi

Caiq miz swlaizsuij

Mbouj caiq rap raemx gyae

Mbouj bae dwk fwnzhaz

Luengqranz gvangq youh soh

Ci itloh baizhangz

Youq cungqgyang aenmbanj

Hoenghhwd dangq aenhaw

Docih dangjcunghyangh

Naek lajmbanj lailai

Fuz beksingq vunzlai

Bongh baihnaj Siujgangh

Gwn daenj youq mbouj you

Lij aeu caiq bued cienz

Vih ceng’aeu saedyienh

Lajmbanj bienq gyaeundei

Mijgven gyoengq lingjdauj

Gaem sauqbaet daiqdaeuz

Roengz daengz lajmbanj daeuj

Goemzgyaeuj gauj veiswngh

Hengzdoengh youh senhconz

Gangj gij hong dangqnaj

Seuqcingh caeuq loegvaq

Daihgya caez okrengz

Vanzging aeu cinghseuq

Ndaem faex heu mbanjranz

Song mbiengj loh song hangz

Ndaem va bangx bien loh

Saedyienh mbwn ciengz lamz

Va rang roeg caiq eu

Raemx saw faex engq heu

Bid heuh deih engq cingh

Lajmbanj bienq gyaeundei

Guengjsae raeuz miznaj

Raeuz daengx guek cunghvaz

Fanzvaz engq hwngvuengh