Daeuhfouh yingzyangj lai, caemhcaiq hamz miz diet、gai、linz、meij daengj ndang vunz aeu miz lai cungj veizlieng yenzsu haenx, lij hamz miz dangz、youzdoenghgo caeuq youhciz danbwz gig lai. Ciengz gwn daeuhfouh, ndaej bouj ndaw ik heiq、siu hwngq nyinh sauj、seng raemx gaij hozhawq、cingswiq dungxsaej.

Daeuhfouh cawz miz gij goengnaengz demgya yingzyangj、bangcoh siuvaq、hawj vunz lai gwn ndaej doxgaiq le, doiq diuzheuj、goetndok sengmaj fazyuz hix daih miz ndeicawq; de mbouj hamz miz danjgucunz, dwg gij yw ndei boux baenz hezyaz sang、hezcij sang、danjgucunz sang caeuq boux baenz doenghmeg giet ndongj、boux baenz gvanhsinhbing haenx.

1、Yw dwgliengz. Aeu 50 gwz daeuhfouh, 10 daengz 15 gwz daeuhseih cit, 5 dug coengbieg caez cawj ndat daeuq, swnh ndat gwn caemhcaiq cw denz hawj ok hanh.

2、Yw cihgi’gvanj ae’ngab. (1) Aeu 500 gwz daeuh- fouh, 60 gwz dangzngazmeg, boi raemx lauxbaeg ndip ndeu doxheuz cawj goenj, ngoenz faen 2 baez gwn. (2) Aeu 120 gwz daeuhfouh, 15 gwz ngveih makgingq, 30 gwz mazvangz, yungh baengz suek ndei song meih yw doeklaeng caiq caeuq daeuhfouh itheij cawj goenj, gwn dang caeuq daeuhfouh, ngoenz 2 baez.

3、Yw feigezhwz. (1) Aeu daeuhfouh、dangznae、rag cwzse ndip(鲜泽泻根) gak di ndeu caez baek raemx, cawz nyaq gwn raemx. (2) Aeu ganjmbaw cwzse(泽泻茎叶) caeuq daeuhfouh cawj gwn, ngoenz fuk, lienz gwn 1 daengz 3 ndwen.

4、Yw dungx hawnyieg. Aeu 50 gwz nohyiengz cawj cug, gya 200 gwz daeuhfouh, 15 gwz hingndip, dwk gyu diuzfeih gwn.