□Vangz Dwzcungz Cinz Cunghginz/ 黄德崇 覃忠群

8 nyied 3 hauh daengz 5 hauh，Cunghgoz Minzcuz Yijvwnz Fanhyizgiz youq gih raeuz Sangswh Yen hai Aen Hoih 2013 Nienz Lauxhangz Vahcuengh Sawcuengh Fanhoiz. Cunghgoz Minzcuz Yijvwnz Fanhyizgiz fugizcangj Lij Yuzlen, Gvangjsih Gihminzyijveij fucujyin Yangz Gijbyauh camgya aenhoih, caemhcaiq youq gwnz hoih gangjvah. Miz 20 lai boux lauxhangz Vahcuengh Sawcuengh fanhoiz gih raeuz caeuq sengj rog daeuj camgya hai hoih.

Youq gwnz hoih, gyoengqboux lauxhangz Vahcuengh Sawcuengh daujlun gij vwndiz youq fanhoiz sawloih moq Vahcuengh Sawcuengh seiz mbouj doengjit、mbouj gveihfan haenx, gyoengq boux lauxhangz lij saemjdingh le 250 diuz sawloih moq Vahcuengh Sawcuengh, vih guh ndei hong Sawcuengh gveihfanva、byauhcunjva、sinsizva gensez dwkmaenh giekdaej, vih hong minzcuz yijvwnz fanhoiz ndaej fazcanj fanzyungz ngeix banhfap ok geiqmaeuz.

Cunghgoz Minzcuz Yijvwnz Fanhyizgiz Sawcueng Fanhyizsiz cujyin Vangz Dwzcungz gaisau naeuz, hai aen hoih neix muzdiz dwg Vihliux gvancez lozsiz aen vwnzgen cingsaenz《Gij Cijdauj Yigen Guekgya Minzveij Gvendaengz Caenh’itbouh Guh Ndei Hong Minzcuz Yijvwnz Fanhoiz》neix, caenh’itbouh guh ndei gij hong minzcuz yijvwnz sawloih moq byauhcunjva、gveihfanva. Gyoengqboux lauxhangz Vahcuengh Sawcuengh camgya baez hoih neix, cwngzsw sang, 20 lai boux lauxhangz dingzlai dwg fugauhgiz cizcwngh doxhwnj, ndawde miz 9 boux dwg cwnggauhgiz cizcwngh. Gyoengqde mizmbangj dwg guh hong gyauyuz、 guh hong sinhvwnz, mizmbangj youq gihcwngz guh hong minzcuz yijvwnz, ginghyen gig fungfouq. Gyoengqboux lauxhangz youq gwnz hoih ndiepcingz dangqmaz, siengj maz gangj maz, haeujlaeg yenzgiu, mboujdanh gaijgez liux 250 diuz sawloih moq Vahcuengh Sawcuengh saemjdingh yinvu, lij doiq fanhoiz Vahcuengh Sawcuengh ndawde mbangj gvilwd gveihcwz yinsiz moq guh damqra daujlun, sawj yawjfap daihgya ndaej doxdoengz.