欢乐热闹的布努瑶传统节日“祝著节”

□马志华 ingj/sij

“Cietcuzcu” dwg gih raeuz Duh’anh、Bahmaj、Dava daengj ranghdieg haenx ngoenzciet conzdungj nauhyied hoenghhwd Bunujyauz ndeu, aeu liggaeuq ndwenngux ngeihgouj guh ngoenzcingq cietheiq, moix bi gvaq baez he, doengciengz angq hoh sam ngoenz. Ngoenzciet, gyoengq beixnuengx Bunujyauz doxcomz youq diegdangz, roq nyenz diuq foux, ciengq go goengcoj, niemhngeix gij lizsij gyaenanz、conzdungj najrongh minzcuz bonjfaenh, hawj vunzlai engq doxgiet doxhuz. Riengzlaeng lij miz doiq fwen、cit bauqbonghmbwn、dwkgyangq、roegciu doxdoj、nyingz naq doxdax daengj lai cungj lai yiengh vwnzdij hozdung dem, ciengzmienh angqyangz nauhyied.

Ciuq cam rox, “cietcuzcu” gaxgonq heuhguh “cietdaznuj”, lij heuhguh “cietmehcoj”、“cietngeihgouj”、“Yauznienz”. “Cuzcu” dwg ciuq Vahyauz “daznuj” yaemhoiz gvaqdaeuj, eiqsei dwg mehlaux, caemh miz gij eiqsei “ciengxlwenx gaej lumz”, “cietdaznuj” eiqsei couhdwg ngoenzciet ciengxlwenx gaej lumz yahcoj Yauzcuz saenzmbwk Mizlozdoz. Riuz naeuz liggaeuq ndwenngux ngeihgouj dwg ngoenzseng yahcoj Yauzcuz Mizlozdoz, daihlaeng aeueiq ndiepgyaez de, couh dingh ngoenz neix guh ngoenz angq hoh souyienz. Moix bi liggaeuq ndwenngux ngeihngux daengz ngeihgouj, gyoengq beixnuengx Bunujyauz ranghdieg Duh’anh、Bahmaj、Dava daengj yienh cungj angqyangz doxcomz caez gvaq aen cietheiq neix. Ngoenz haenx, gyoengqvunz comz youq diegdangz, roq nyenz caeqbaiq, ciengq go niemhngeix, riengzlaeng faenbied guh gij hozdung diuq foux nyenz、dwkgyangq doxdax、geij vunz caemh daenj haizgiegraez beij buetvaiq、nyingz naq doxdax daengj, guh ndaej nauhyied hoenghhwd, dauqcawq dingqnyi sing bekfwngz sing hemq ndei. Ngoenzciet dangyienz yaek aeu loengh byaek gwn laeuj, ngoenz haenx ranzranz gaj gaeq gaj yiengz, daek laeujhaeux gethom gag siu okdaeuj, cingj caencik baengzyoux gwn “laeujriu”, sing gingqlaeuj, sing hatmax gyukgyadgyad, baenz hwnz mbouj dingz.

“Cietdaznuj” daj Ciuhsung hainduj baenz ciet, ginggvaq lizsij boekbienq, cugciemh daj cietbaiqsaenz ndawbiengz bienqbaenz cietfungsou caeuq cietbingzan, 1986 nienz, Swcigih Minzveij ciuq gij simnyienh beix- nuengx Bunujyauz, dawz “cietdaznuj” gaij heuhguh “cietcuzcu”; 2007 nienz, aen ciet neix ndaej lied haeuj Gvangjsih raeuz buek daih’it swcigih gaep feihvuzciz vwnzva baujhoh mingzloeg.