Seizhah aenvih mbwn ndat, sailwed bouxvunz daengx ndang mbehai, youh yungzheih ok hanh, ndigah, gij hezyaz boux baenz hezyaz sang rox miz di doekdaemq, daihgaiq doekdaemq 12/8 hauzmij gungcu. Haujlai vunzbingh couh gag nyinh- naeuz hezyaz seizhah gig ancienz cix dingz mbouj gwn yw.

Danhseih conhgyah daezsingj naeuz, gag dingz mbouj gwn yw cibfaen loengloek. Yienznaeuz hezyaz youq seizhah miz di doekdaemq, danhseih seizhah hix dwg aen geiqciet hezyaz yungzheih fubfeb ndawde aen ndeu, gij yungyiemj yinhsu de mbouj rox gag siu bae, ciengeiz raegrwz mbouj ndaej. Seizhah mbwn ndat ok hanh lai, lwed niu lwed gwd, lwed lae gemjmenh, hezyaz raemhrwnh doekdaemq, yungzheih baenz uk noix lwed mauhfung. Ndigah, siengj aeu baujciz hezyaz onjdingh, couh aeu youq sinhhezgvanj conhgyah yinjdauj lajde, habliengh gemj gwn di yw he. Doengzseiz lij aeu haeujsim gyangq ndat siu hwngq, lai gwn raemx, ciengzseiz gamcaek hezyaz, dangh- naeuz hwnzngoenz raen miz fubfeb mboujmiz gvilwd, aeu gibseiz bae yihyen hawj canghyw duenq yw cij ndaej.