——中桥小学六一儿童节活动掠影

□Veiz Ginjcunh/韦锦春

Ngoenzneix, ndit ronghndei rumz sangjli. Baenz doiq baenz sueng lwgda rongh- gywggywg haenx, baenz aen baenz aen naj riunyumj dwggyaez haenx loh’ok vuenyungz angqyangz. Ngoenzneix dwg 5 nyied 31 hauh, youq ngoenz ndit ronghcingx neix, youq ndaw sing go angqyangz neix, Vujmingz Yen Senhhuz Cunghgyauz Siujyoz daengx hagdangz saeseng comz youq itheij, angqhoh “roekit” cietlwgnyez.

Gyanghaet caengz daengz 8 diemjcung, gyoengq doengzhag couh comzyouq ndaw hagdangz lo. 8 diemj buenq, guh sausenh duiyenz moq haeujdoih yizsi. Itnienzgaep miz 80 lai boux sausenh duiyenz moq haeujdoih, gyoengqde yungh sing go goksasa daeuj biujdap aen gietsim swhgeij——ndeindei hagsib, hag ndei bonjsaeh bauq guekcoj, vih saedyienh gungcanjcujyi roengzrengz baeguh! Ciepdwk dwg Banh Fanghlanz fuyaucangj gangjvah, de yiengq gyoengq doengzhag camndei, doiq gyoengq sausenh duiyenz moq daezok iugiuz, maqmuengh gyoengqde guh boux sausenh duiyenz maenhndei ndeu. Doeklaeng ciuq ban baen cuj, banhcujyin daibyauj hagdangz dawz huqlaex fat daengz fwngz moix boux doengzhag. Lauxsae youh baen nienzgaep guh youzyenz hozdung. Youzyenz hozdung mizyinx raixcaix. Miz nep naedbohliz, diemjndaeng、diemjbauq、 cai vahduenz; miz doxciep boih cwngzyij、boih seigeq、ciengq go. Lajbyonghngoenz, youh guh doxdax bengcag, gyoengq boux doengzhag doxdax haenx haenqrengz bengcag, gyoengq doengzhag youq baihlaj couh angq dwk heuh “gyayouz” mbouj dingz, sing gyayouz、sing hemqswenj rwenz doh ndaw hagdangz, daengx aen hagdangz nauhyied dangqmaz.

Baez angqhoh hozdung neix, sawj gyoengq doengzhag ndaej gvaq le aen cietlwgnyez angqyangz miz yiyi ndeu.