展示瑶族文化独特魅力的兰田瑶乡“六月六”

□Liengz Yangzcinz ingj Sinhyungz hoiz

Moix bi liggaeuq ndwenloeg coloeg, beixnuengx Yauzcuz cungj angqyangz gvaq “ciet cimz moq”. Ngoenz neix, beixnuengx Yauzcuz angqvauvau caez comz youq diegdangz, guh foux lungzfiengz、diuq foux Buenzvuengz、gwn faengxhom daengj gak cungj gak yiengh hozdung, baijyienj gij vwnzva daegbied gagmiz Yauzcuz hawj gyoengq hekyouz yawj, ciengzmienh nauhyied raixcaix.

“Ciet cimz moq” Yauzcuz, caemh heuhguh “ciet gwn moq”、“ciet buenq bi”. Ngoenzciet, gyoengq beixnuengx Yauzcuz youq baihrog haenx cungj ganj maranz gvaqciet, caenhraen gwnz roen vunz baebae dauqdauq, mbouj dingz mbouj duenh, ngoenz neix gak ranz gak hoh cungj bae daengz ndaw reih ndaw naz, mbaet aeu faek haeuxyangz、riengz haeuxnaz gaenq henjcug haenx maranz cawj cug, sien gueng duzma gwn le, yienzhaeuh daengx ranz vunz cij cimz gwn haeuxmoq. Aenvih fungsug dangdieg ndawde, duzma dwg doenghduz daiq gohaeux daeuj hawj bouxvunz. Bineix ngoenz “loeg nyied loeg”, Gveilinz Si 12 aen Yauzcuz Yangh cungj baij ok fungsug ndawbiengz vwnzyidui comz daengz Lingzconh Yen Lanzdenz Yauzcuz Yangh, hoenghhwd gawjbanh Gveilinz Si Yauzcuz Yangh Minzcuz Vwnzva Baijyienj Nem Lanzdenz Yauzcuz Yangh Daihngeih Gaiq “Loeg Nyied Loeg” Yauzcuz “Ciet Cimz Moq”、Ciet Swnghdai Lijyouz hozdung, dawz gij yisuz vwnzva ndawbiengz Yauzcuz yienghnduj dojdat haenx baijyienj hawj 3000 lai boux hekyouz yawj, aeu yienj gij go foux ndeiraeuh gagmiz, baijyienj ndangdaenj Yauzcuz、hongdawz、fuengfap doj yungh fwngz aeu faexcuk Lanzdenz guhceij, baij gijgwn haekfeih minzcuz hawj bouxhek cimz daengj hozdung miz daegsaek haenx, hawj gyoengq bouxhek ndaej yawj ndaej youz mbat gaeuq ndeu.

Mbangj bouxhek dwg daj Gvangjdungh、Sanghaij ganj daeuj gvaqciet, caenndang camgya gij hozdung ngoenzciet, gamjsouh gij yinxdaeuz vwnzva minzcuz gig miz daegsaek neix, mbangj bouxhek lij doq yawj doq haenh doq aeu sienggih sezsienggih goepingj, naeuz daiq baema hawj beixnuengx caeuq baengzyoux yawj, bi laeng caiq guhdoih daeuj gvaqciet dem.