Seizgan gvaqbae ndaej sawj vunz yienghsiengq bienq laux, hoeng gij gyaez ndawsim vunz ciengxlwenx mbouj rox laux bae.

Daxboh gou dwg boux lauxsae bingzciengz ndeu, saedceij de gvaq ndaej gig bingzdamh, ndaejhoengq dingq di yinhyoz, cimz di cazmoq, gwn di laeujdoj, dwg seiqvunz de gij yinxdaeuz ceiqhung lo.

Mbouj rox daj seizlawz hwnj, daxboh gyaez hwnj soucomz gij doxgaiq dingq yinhyoz, de ceiq gyaez dwg dauq lizdij vanzyauj yinhsiengh ndeu, yienznaeuz itcig daengz seizneix gou lij caengz geiq ndaej dauq yinhsiengh haenx dwg heuh baiz gijmaz. Gij yinhsiengh ndaw ranz cungj mbouj suenq moq, dingzlai dwg gij vunz yungh gvaq caiq gai okdaeuj le, daxboh cij cawx dauqma, hoeng daxboh gig ngamjeiq gij doxgaiq de genj ndaej neix.

Gou naeuz, daxboh maez gij doxgaiq dingqgo neix maez ndaej hawj vunz geizheih. Daxmeh dauqfanj naeuz gou yi, daxboh yienghneix guh cungj dwg aenvih bihaenx gou gangj gvaq coenzvah yienghneix:“Doengh gaiqdingqgo raeuz dingq hwnjdaeuj mizdi bienqdiuh lo.” Itcig daengz seizneix, daxboh lij gyaez naengh youq gwnz aen eijngauz, itmienh dingq yinhyoz, lij itmienh cam gou:“Iq, mwngz raen dauq gaiqdingqgo neix baenzlawz yiengh?”

Singgo youq ndaw yinhsiengh daxboh ciengq le haujlai bi, youq ndaw gij singgo doenghsim haenx, dinbyoem daxboh ciemhciemh bienq hau.

Mbouj rox daj seizlawz hwnj, daxboh gyaez hwnj gwn caz lo, ndaej- hoengq couh heuh baenzbang baengz- youx daeuj, itmienh gwn caz itmienh lwnhgoj, lwnh baenz ngoenz baenz hwnz; de hix gyaez gag cimyawj aen huzswjsah baengyoux de haujlai bi gaxgonq soengq hawj de haenx, gag angq gag yinx. Daxmeh naeuz, neix cungj dwg aenvih bihaenx yawjraen gij yiengh gou dingz yamqdin youq henz bouqcaz, yawj gij raemxcaz sawdikdik ndaw cenjcaz da cungj mbouj yaep, heuh hix mbouj deuz. Itcig daengz seizneix, daxboh lij gyaez rag gou naengh youq henz ndang de, caeuq de cimz gij caz de ceiq daekeiq haenx, yienzhaeuh cij cam:“Iq, mwngz raen gij caz neix baenzlawz yiengh?”

Gij raemxcaz youq ndaw cenjcaz lae hom le haujlai bi, caemhcaiq youq ndaw haemzgam doxgap haenx, gwnz gyaeuj daxboh byoemhau ciemhciemh demlai.

Mbouj rox daj seizlawz hwnj, daxboh gyaez hwnj oemqlaeuj lo. De gwn laeuj, hix cij gwn gij laeuj gag oemq haenx. Bi daengz makitroeg baenzgwn, de cungj yaek bae cawx ma haujlai haujlai, cungj gyaez coi daxmeh:“Oemq vaiq di, yienghneix gvaqcieng seiz lwg’iq dauqma couh ndaej gwn lo.” Mbatneix dwg daxmeh gag lwnh gou nyi, gij yiyi daxboh oemqlaeuj, dwg daj laeng gou bihaenx gwn sat gaemz laeuj makit le gwnznaj cuengqrim gij angqyangz haenx.

Gij laeuj ndawbiengz caem le haujlai bi, youq ndaw gij laeuj homfwtfwt neix, diuzhwt daxboh ciemhciemh bienq goz lo.

Hwnz gvaq ngoenz daeuj, seiz byaij gingj bienq, hoeng gyaez daxboh cix lumj gij yinhyoz neix, mbawcaz neix, gij laeujndei neix, gaek youq ndawsim gou, gvaq ndaej yied nanz, yied saenqdoengh sim vunz.