独具地方特色的龙州“龙元节”

□Yenz Causinh ingj Sinhyungz hoiz

Moix bi liggaeuq ndwen- ngeih co’ngeih roeb ngoenz “lungz ngiengx gyaeuj”, seiz- neix cin raeuj va hai, fanh foed angj loeg, youq gih raeuz Lungzcouh Yen, gyoengqvunz caemh angqyangz dwk hoengh- hwd gvaq “cietlungzyenz”, caeqbaiq Goengdojdeih, guh ceizngaih ceizndek, foux lungz foux saeceij, danz denhginz ciengq go, nauhyied raixcaix.

Youq baksok dounamz Lungzcouh Yen, miz gizdieg funghgingj gyaeundei ndeu heuhguh “song lungz ciengj caw”, vunzraeuz bae Lungzcouh cetyouz cungj bae gizde yawjyawj. Riuz naeuz, moix bi liggaeuq ndwenngeih co’ngeih, duzlungz- heu caeuq duzlungzhenj gizneix couh hainduj doengh hwnjdaeuj lo. Duzlungz dwg saenz gyoengq- non, duzlungz daeuj lo, gak cungj gak yiengh nonhaih couh ndoj hwnjdaeuj, baenzneix bouxvunz couh ndangcangq、doenghgo couh maj ndei. Gyoengqvunz rangh Lungzcouh Yen vih cingj duz- lungz ma nda’nduengq gvaq fwj doek fwn、gyaepcawz nonhaih、mbaenj ndaej fungsou bouxvunz ndang cangq souhyienz, moix bi cungj youq ngoenz neix hoengh banh gij hozdung “cietlungzyenz” gig miz daegsaek dangdieg haenx. Ngoenz neix, lajmbanj Lungz- couh Yen ranzranz cungj aeu haeuxcid caeuq go’ngaih、mbaw- goyaed doxgyaux naengj cug daem guh ceizngaih, mbangj aeu mbawgyoij duk naengj baenz ceizet, caez bae caeqbaiq Goeng- dojdeih, mbangj dieg daengx mbanj daengx diuzgai ok ngaenz ok byaeklaeuj doxgo, cingj goengdauh daeuj “dajcai”、 ram Goengdojdeih youz mbanj, mbaenj vunzlai ndangcangq vuenyungz、guh gaiqgaiq cungj baenz. Doengh bi neix daeuj, Lungzcouh Yenveij Yencwngfuj yawjnaek gij hozdung vwnva ndawbiengz minzcuz neix, moix bi cungj youq yienhsingz guhdaeuz banh gij hozdung duzlungz、saeceij、funghraiz hoenghhwd youzgai caeuq foux lungz foux saeceij doxdax、denhginz danzciengq、yienj go foux minzcuz daengj, hawj vunzlai gvaq ciet engq angqyangz, engq nauhyied. Lumjbaenz bineix “cietlungzyenz” geizgan, daengx yienh couh miz 16 aen doihfouxlungz caeuq 14 aen doihfouxsaeceij camgya “lungzvuengz”、“saeceijvuengz” doxdax, lij banh le denhginz danzciengq、diuq foux denhginz、diuq foux funghraiz daengj fungsug minzcuz biujyienj dem, miz 3 fanh lai hekyouz ganj bae ngonzyawj, ciengzmienh hoengh- hwd nauhyied.