□ Couh Gveifung / 周桂凤

Liujgyangh Yen Sawcuengh Yozyau Fusuz Siujyoz seizneix miz saeseng 2500 lai vunz, dwg aen sifan yozyau Liujgyangh Yen minzsuz vwnzva haeuj hagdangz caeuq Cuengh Gun song saw vah sonhag ndeu, hix dwg aen sifan yozyau “Cib’it haj” Daengx Guek Cunghvaz Minzcuz Conzdungj Meijdwz Gyauyuz Sizyen Yenzgiu ndeu.

Yozyau gig yawjnaek minzsuz vwnzva caeuq minzcuz conzdungj meijdwz gyauyuz, aeu “swnjcienz minzcuz vwnzva, yienjok dwzyuz daegsaek” banhhag, vih hawj lwgnyez rox vwnzva Bouxcuengh, yozyau dawz minzsuz vwnzva Bouxcuengh bien baenz 6 cek 10 fanh cihsaw yaubwnj gyaucaiz, fanhoiz baenz Sawcuengh. Yozyau banh aen minzsuz vwnzva cangzlangz heuhguh “Cuengh Ndei”, baen baenz 12 gaiq, daezmoeg aeu Sawcuengh caeuq Sawgun sij.

Gaiq daih’it aeu “Cuengh Ndei” guh cawjdaez. Neix dwg Cungguek Gyauyuz Cwzva Yozsuz Yenzgiuvei misuhcangj Liuz Bingj- minz daengz yozyau yawjraen banhhag daegsaek seiz daez okdaeuj.

Gaiq daihngeih dwg dinghvih ndei. Yozyau dawz minzsuz vwnzva Bouxcuengh daeuj son’gyauq, yozyau ngoenz beij ngoenz ndei，hagseng hag le majhung rox saehleix. “Ndei” dwg gangj simndei, vahndei, guh ndei, dieg ndei.

Gaiq daihsam dwg simndei. Yozyau guh gak cungj gak yiengh hozdung, hawj hagseng youq ndawde rox leix, rox baenzlawz guh bouxvunz simndei.

Gaiq daihseiq dwg gangjguh ndei. Saeseng gangj vah guh saeh aeu gangj daengz guh daengz.

Gaiq daihhaj dwg vanzging ndei. Ndaw yozyau lumj suenva nei ndeiyawj, gizgiz yienh’ok yienghceij ndei Bouxcuengh.

Gaiq daihroek dwg gwnzdangz ndei. Hagseng youq gwnzdangz bouxboux guhfaenh, yiengjsouh gij angq hagsib.

Gaiq daihcaet dwg minzsuz ndei. Yozyau soucomz cingjleix doenghgij gojlwgnyez、vahsug、fwen、gojgwnzbiengz、vwnzva gaiqgwn Bouxcuengh, dawz de biensij baenz 《Lwgnyez Yawj Minzsuz》、《Byaij Haeuj Minzsuz Bouxcuengh》daengj yaubwnj gocwngz, son’gyauq hagseng.

Gaiq daihbet dwg hengzguh ndei. Yozyau ciengz hai cawjdaez hengzguh hozdung, hawj hagseng youq ndaw swnghhoz yawjraen gijndei, bae guh saehndei.

Gaiq daihgouj dwg yindung ndei. Yozyau hai minzsuz gogenh hozdung; bibi banh yindungvei, sawj hagseng ndangdaej engqgya cangq.

Gaiq daihcib dwg huzndei.

Gaiq cib’it dwg soundaej ndei. Yozyau yungh “Cuengh Ndei” minzsuz daegsaek banhhag, ndaej daengz lingjdauj、conhgyah yawj- naek, yozyau ndaej haujlai ciengj, yied daeuj yied mizmingz.

Gaiq cibngeih dwg muengh- gyae. Lauxsae sonsaw ak, hagseng hagsib cingzcik maenhndei. Saeseng lij gaenx son gaenx hag, maqmuengh ngoenzcog engqgya ndei!