Seizhah mbwn ndataeng, cingzsi bouxvunz yungzheih fanzluenh. Gwnndoet wng aeu cing bouj、cangq mamx、siu hwngq vaq caep guh yenzcwz, wnggai gwn di gijgwn cingdamh nyinh yaem ndeu, lumj nohbit、raetmoguh、raetngaenz、haeuxlidlu daengj. Linghvaih, lij ndaej cawj di cuk duhheu、cuk mbawngaeux daeuj gwn. Caemhcaiq gwn di haeuxco、nohbya、lwghaemz、byaek- ginzcai、makbingzgoj daengj dem. Danhseih, feih haemz aeu yawj vunz bae gwn, boux beizheiq hawnyieg mbouj hab gwn lwghaemz caeuq laeujbizciuj.

Seizhah mbwn ndat ok hanh lai, bouxvunz amq bak mbouj ndei. Wnggai gwn gak cungj cuk baujgen daeuj sekdungx caemhcaiq diuzleix aenndang. Lumj ngaizromh caeuq haeuxcaeuz gwn cuk, donqngaiz gwn dang, baenzneix gawq ndaej seng raemx gaij hozhawq、cingliengz gaij hwngq, youh ndaej bouj ciengx aenndang. Mwh cawj cuk seiz dwk di mbawngaeux ndeu, feihdauh hom ndei, ndaej sekdungx、siu hwngq、seng raemx leih nyouh. Mwh cawj cuk seiz dwk di duhheu ndeu roxnaeuz dandog aeu duhheu daeuj aeuq dang gwn, ndaej siu hwngq gaij hozhawq、siu ndat gaij doeg. Linghvaih, cuk lwglimz、cuk bozojcah、cuk raet- ngaenz、cuk gaeugat、cuk lwghaemz hix dwg gijgwn ndei seizhah ciengx ndang.