Vihliux gvancez lozsiz minzcuz yijvwnz cwngcwz dangj, sawj Sawcuengh ndaej bang hong sanhnungz fuzvu, 5 nyied 4 hauh daengz 27 hauh, Swcigih Minzyijveij youq Gveigangj Si Cinzdangz Gih Mungzgungh Yangh Minzcuz Cuhgiz Cunghyoz gawjbanh Gaiq Daihroek Bouxcoz Dauqmbanj Sawcuengh、 Cizyez Ginwngz Beizyinbanh. Hagseng aen beizyinbanh neix cungj dwg gyoengq hagseng cuhcungh bizyez yaek dauqmbanj okbae ra hong guh haenx. Gyoengqde youq aen beizyinbanh neix hag Sawcuengh gihcuj cihsiz、 fazliz cihsiz、dennauj gihcuj cihsiz. Guh beizyin Sawcuengh, dwg siengj sawj hagseng doenggvaq Sawcuengh hag rox monz ginwngz ndeu. Lauxsae lij son gyoengq hagseng ok rog bae dajgoeng aeu rox yungh faplwd cihsiz ndaej baujhoh bonjfaenh.

Ginggvaq 20 lai ngoenz beizyin, gyoengq yozyenz hag rox le Sawcuengh gihcuj cihsiz, cobouh hag rox dennauj gihcuj cihsiz caeuq saedyungh ginwngz. Doenggvaq baez beizyin neix, ndaej daezsang naengzlig gyoengq bouxcoz ngamq yamq haeuj sevei, vaiqdi ra ndaej hong guh. Mwh beizyin, Swcigih Minzyijveij Yingyungcu lingjdauj caeuq Cinzdangz Gih mizgven lingjdauj bae daengz ndaw ban sonyinx hong beizyin.