□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Veiz Gozcingh bi 1962 youq gwnz daihhoih Swcigih Daihngeiz Baez Dangj Daibyauj haenx daezok yaek youq 3 bi ndawde dauqfuk swnghcanj haeuxgwn daengz gij muzbyauh bi 1957 haenx, daengz bi 1965 mboujdanh ndaej saedyienh le, caemhcaiq mauhgvaq le 13.98%.

Bouxraiz daegdaengq cienmonz bae caijfangj gvaq boux doiq Guengjsae fazcanj gofoed miz goenglauz yienhda —Dingh Saulanz, vunz heuh de guh “suhgi gofoed”, de naeuz, youq mwh “vwnzgwz”, de deng dingz gvaq geij bi hong, Veiz Gozcingh okaeuj guh hong le cienmonz cam vunz gij cingzgvang de, bi 1971 hwnj ndaej dauqcungz guh hong, gvaqlaeng anbaiz youq Yilinz Digih guh nungzban fucujyin、vwnzgyauban cujyin、boux fuconyenz. De ciuqyiengh gig gvansim hong ndaem gofoed. De dawz fung saenq Huz Ciswngh bi 1986 sij hawj de haenx okdaeuj, Huz Ciswngh nyuenz dwg boux Cunghgoz Nungzyez Gohyozyen Bwnhnamh Yenzgiusoj sojcangj, gohgiz veiz- swnghvuz conhgyah, de gaxgonq bae gvaq Yungzyen bang fazcanj ndaem gofoed, de youq ndaw fung saenq neix nyinhnaeuz, Dingh Saulanz youq Yungzyen “Haicauh baenz aenbuenz moq, hawj go’nywjvahoengz ndaej ndaem doh diegnamz guek raeuz.”

Dingh Saulanz dauqngeix Veiz Gozcingh bihaenx gvansim caeuq dingjrengz Yungzyen ndaem gofoed, gikdoengh dwk naeuz: “Danghnaeuz mbouj ndaej Veiz Gozcingh dangq ndaem gofoed dwg hangh cosih canloz fazcanj nungzyez swnghcanj haenx daeuj gaem maenh nei, Yungzyenz ndaem gofoed haengjdingh mbouj ndaej mauh gveihmoz vaiqriengj fazcanj, Guengjsae caemh mbouj ndaej geij bi cix ndaem gofoed baenz cien lai fanh moux, youh baenzlawz ndaej yingjyangj caeuq ndaem doh dieg baihnamz guek raeuz ne? Ndigah, gij goenglauz neix wnggai gvi Veiz Gozcingh.”

(caengz sat)