4 nyied 20 hauh ngoenzde, Baekging mbwn seuq rumz swnh. Ndwn youq gwnz dingj Bya’gyaeu Yenzmingzyenz, yawj ndaej raen gingjgyaeu seiqhenz cingcuj dangq- maz. Seizcin Baekging aen singz gaeuqgeq neix, yinx hekyouz daj seiqgyaiq gak dieg daengz neix youz.

Mwh gou daj Bwzgunghmwnz naengh didez daengz Yenzmingzyenz gaenq dwg lajbyonghngoenz 4 diemjcung. Suenq hwnjdaeuj baezneix dwg gou baez daihsam yamqhaeuj Yenzmingzyenz lo: Bi 1986 seizhah, gou caeuq doengzhag daeuj neix youz gvaq, gwqhaenx Yenzmingzyenz ngamq hailangh hawj vunz youz, lij geiq ndaej doengh goliux lij dwg iqetet; sam bi gonq gou ndaej iu daeuj Baekging guh hong fanhoiz “songhoih”, ngoenz yietnaiq he gou baez daihngeih byaij haeuj dieg neix, hoeng gwqhaenx cingq bungzdaengz geij ciengz siet hung, ndaw gunghyenz cungj ngaiz siethau goemq dwk, yienznaeuz gij goliux gaenq majsang baenz faex lo, hawj gou doeknaiq dwg nyefaex ndoqliuliu mbouj lamq saek mbaw. Ngoenzneix Minzganyen hawj bang yozyenz dou yietnaiq, swnh aen gihvei neix gou baez daihsam byaij haeuj Yenzmingzyenz, baezneix dauq- youz dieggaeuq, cujyau dwg yawj gij yienghceij goliux ngamq haeujcin haenx.

Gingjgih Yenzmingzyenz miz 5000 lai moux gvangq, miz 40 lai dieg gingjdenj, geij aen huzraemx hung couh ciemqbae dingz lai menciz. Daj aendou baihnamz byaij haeuj, gou sien riengz diuz roencaeprin he byaij gvaq baihgvaz bae, gizde geij aen huzraemx aen lienz aen, gig gyae couh yawjraen goliux longz geu ‘buhheu’ he go gek go caemhcaez heux gvaq henz huz. Raen daengz goliux, yamqdin gou gag vaiq hwnjdaeuj.

Daengz gyawj sijsaeq yawj goliux, roxnyinh ‘geubuh’ de saed- caih gyaeundei dwggyaez, mwngz yawj, mbawliux cungj dwg heuyauyau, oiqcupcup, lumjnaeuz yaek nyinhraemx okdaeuj nei. Engq sawj gou roxnyinh geizheih dwg, gij nye gij mbaw gownq cungj dwg maj doxhwnj, nye goliux fanjdauq dwg maj dauqdoet. Gij mbawoiq de lumj ngaiz diuz maesei roix dwk venj youq ganjfaex, baenz lumq baenz lumq maedcaedcaed duengq roengz lajgoek daeuj, lumj byoemraez, youh lumj geuvunj. Gou ngaem gyaeuj byaij gvaq lajgoek bae, nyaenx mbouj ndaej iet fwngz bae lumhlex de.

Hoeng ceiq yinx gou haenhndei dwg yiengh de riengz rumz “diuqfoux” lo. Raq rumz baez ci daeuj, goliux lumj sauoiq diuq fouxbahleiz nei diuqyebyeb, gwqhaenx yungh gawq cwngzyij ‘unqneuz gyaeundei” daeuj beijgangj de ceiq habdangq lo, nanzgvaiq vunzbiengz haengj dawz de beijguh dah saulengj unqswnh he ne! Daj ciuhgeq gvaqdaeuj, miz haujlai bouxsijfaenzcieng danq gvaq goliux, gou lij geiq ndaej miz hot sei Dangzcauz he cohheuh 《Danq Faexliux》 dwg yienghneix sij : Heuoiq cang baenz gofaex sang, cienfanh diuzliux lumj saicouz; byawz caiz mbawliux mwngz rox mbouj, rumzcin ndwenngeih dwg faggeuz.

Goliux gwnzhamq mbinyebyeb, hoeng gij ngaeuz gwnz raemx de ityiengh dwg fanh cungj funghcingz, mboujdanh gou ngaiz de maez dwk cuengq menh yamqdin, couh lienz geij doiq bitraemx lij maij comzyouq gwnz raemx lajgoek sep raemx guh- caemz. Goliux yiengh faex neix haengj maj youq diegcumx henz raemx, laxlawz de dawz raemxhuz guh aen- gingq daeuj cang gyaeu bonjfaenh ne!

Mbouj rox mbouj nyinh gou byaij ndaej haujlai gyae. Yaek daengz dieg gingjgih Sihyangzlouz le, gou youh vang gvaq baihgvaz daeuj riengz hamq Huzfuzhaij byaij. Doengh gij huz ndaw Yenzmingzyenz dwg aen Huzfuzhaij ceiq gvangqlangh hix ceiq mizmingz. Goliux、miengraemx、giuziq doengh gij neix hawj Yenzmingzyenz gig miz yiengh daegsaek mbanjraemx gyangh- nanz, gou byaij youq ndawde youh lumj byaij youq mbanj swhgeij nei.

Bouxyouz doih haeuj doih ok byaij gvaq henz ndang, sing lahbah bouxdaujyouz yinx gou dauqngeix aen gingdouz ndaw denyingj 《Feizcoemh Yenzmingzyenz》: Bi 1860 ndwen 10 ngoenz he, doihbing Yinghfaz Lenz- ginh coemj haeuj dieg neix daeuj, feiz coemh ndawde, gaj dai 300 lai boux bingsouj le doxceng bae ciengj huqbauj ndawde. Bang caeg byoem henj da loeg neix guh ndaej suenj lai lo, yienghlawz aeu ndaej cungj mbouj lamq, yienghlawz gwed mbouj ning couh dub soiq roxnaeuz feiz coemh bae. Bi 1900, bang bing Betguek Lenzginh youh caiq nyoengx haeuj neix daeuj, Yenzmingzyenz youh caiq ngaiz gyoengqde giepciengj buqvaih. “Aen suen ceiq gyaeu lajbiengz” neix couh yienghneix mied youq lajfwngz song bang caeg neix lo……

150 lai bi gaenq baenz lizsij, gaxgonq dieg ngaiz caeg caij gvaq coemh gvaq haenx, ngoenzneix gaenq dwg dieg goliux mbinfaedfaed gingjsaek maezvunz he. Dwg goliux hawj gou camhseiz lumz le duenh gindaisij hawj vunzguek saetnaj haenx.

Gyanghaemh mbwn ciemhciemh laep, yienghceij goliux hix bienq ndaej moengzloengz hwnjdaeuj. Da myab raen gij daengnizhungz laeuzsang seiqlengq yaeplwenq myabmyab, gou roxnyinh seizneix youq diegnamh guekcoj raeuz rumzcin raeujrub, doenghgo cungj lumj go goliux neix maj ndaej oiqupup, heuyauyau!