独具壮族边民特色的金龙镇“侬垌节”

□Cinz Youjcaiz ingj Sinhyungz hoiz

Cietlonghdongz dwg ngoenz- ciet Bouxcuengh henzguek Lungz- couh Yen Ginhlungz Cin gag miz, eiqsei de gaxgonq dwg caeqbaiq diensaenz, mbaenj goengmbwn soengq fuk gwnzbiengz, hawj fwn yinz rumz dingh daengj, seizneix neiyungz ngoenzciet cawz miz caeqbaiq hozdung le, lij demgya le haujlai vwnzdij hozdung ndaw- biengz, hawj ngoenzciet engq hoenghhwd mizyinx.

Youq Ginhlungz Cin, gak aen mbanj ngoenz gvaq cietlonghdongz cix mbouj doxdoengz, daj ndwencieng cobet daengz cibseiq caet ngoenz neix ndawde moix ngoenz cungj miz aen daengz geij aen mbanj gvaq ciet, lumjbaenz “mbanjsaulengj” Mbanjbanjciz dwg youq moix bi ndwencieng cib’it gvaq ciet. Ngoenzciet, ndaw mbanj ranzranz cungj gaj gaeq daiq laeuj bae dieg gvangqbingz gyaeujmbanj baij ndei caeq saenz, lij cingj goengdauh vih gak ranz gak hoh caeq saenz mbaenj fuk; gyoengq caencik beixnuengx gij mbanj doxdep haenx caemh comz daengz ndaw mbanj yawj nauhyied, gwn laeuj, camgya guh gak cungj gak yiengh vwnzdij hozdung, ciengz- mienh nauhyied hoenghhwd. Aenvih hozdung gag miz daegbied, daegsaek minzcuz naekgywg, caemh hawj haujlai conhgyah yozcej、bouxingjsiengq caeuq hekyouz ganj bae yawj nauhyied, ngoenzciet couh engq mizyinx lo.

Haet ngoenzciet ranz ngamq rongh, gyoengq lauxnyaeq saimbwk aen mbanj gvaq ciet caeuq gij mbanj henzgyawj haenx couh hwnqmbonq, daenj buh bonj minzcuz moqsupsup cangndang gyaeugetget le, doxiu doxheuh guh doih daj seiq fueng bet baih byaij coh aen mbanj neix gvaq ciet, baenzneix ndaw mbanj neix couh ciemhciemh nauhyied gyukgyad hwnjdaeuj. Hozdung caeqbaiq sat le, vwnzdij hozdung ndawbiengz couh foenxfoenx lienghsiengq, foux lungz、gaeqdoxdoj、dwkdomq、lanz- giuz doxdax、 bengcag、diklwggienq、dwklwggyangq、doiq fwen、diuq foux minzcuz daengj ndeiyawj yinx vunz, moix giz cungj miz vunz humx dwk ndaetfwdfwd, sing bekfwngz、sing hemq haenh mbouj dingz gvaq. Fouxfunghraiz cungj foux caenh Ginhlungz Cin gag miz neix hawj gyoengq vunzhek roxnyinh gig mizyinx, caenh raen bouxfoux longz duz “fungh” aeu faex guh gyaeuj aeu baengz guh ndang ndeu youq gwnz ndang, ngaem hwet goemz gyaeuj diuqyekyek, lij cang lumj duzgaeq nei yaep he dot gijgwn vaek doxgaiq, yaep he bae gyaep dot duzlungz duzsaeceij, yiengh- siengq dwggyaez youh dwgriu, hawj gyoengq vunzhek riuhaha hwnj- daeuj. Youq ngoenzneix, doiq fwen caemh dwg ceiq miz daegsaek minzcuz lo, gyoengq mbauqsau ceiq yinx, aenvih gyoengqde mboujdan ndaej langhsing eu fwen, mbangj lij doenggvaq eu fwen ra youx dwen ndiep; seizneix cawz miz fwenyoux le, gyoengq canghfwen lij aeu cungj hingzsik doiq fwen neix senhconz dangj raeuz cwngcwz ndei, haenhdanq saedceij gyaeundei ngoenzneix, hawj gyoengqvunz daj ndaw sing fwen sepset rwenzred haenx, dingq ok faenh simhoengz gyoengq vunzmbanj ndiepgyaez dangj caeuq guekcoj raeuz, haenhdanq saedceij vuenyungz seizneix, maqmuengh daengzcog engq vuenyungz gyaeundei haenx.