Makdoengj seizhah hamz veizswnghsu C、veizswnghsu B1、veizswnghsu B2, ndaej coi naengnoh sup aeu baiz ok caeuq lwed lae baedauq, hawj naengnoh hausek、naengbak dumznyinh、lwgda unq nyinh. Lai gwn makdoengj seizhah ndaej henhoh naengnoh, hawj naengnoh lai ndei ngonz, youh ndaej siu hwngq.

Ndaw makdoengj hamz miz veizswnghsu C caeuq veizswnghsu P, ndaej hawj aenndang dem rengz dingj bingh, demgya danzsingq sailwed, gyangqdaemq danjgucunz ndaw lwed, fuengzceih hezyaz sang caeuq doenghmeg giet ndongj. Veizswnghsu C ndaej dingj yangjva, ndaej fuengz aiz ceih aiz. Audaliya Lenzbangh Gohyoz Caeuq Gunghyez Yenzgiu Cujciz gyoengq conhgyah fatyienh, ciengz gwn makdoengj ndaej hawj conghbak、conghhoz、dungxsaej daengj giz noix baenz aizcwng 50%, hawj baenz mauhfung fatbinghlwd doekdaemq 19%, doengzseiz doiq binghsailwed、fat biz caeuq binghnyouhdangz hix miz itdingh yawhfuengz cozyung.