Ciuq Swcigih Gyauyuzdingh《Aen Dunghcih Mizgven Doiq Daengx Gih Cuengh Gun Song Vah Saw Siujyoz Bizyezbanh Guh Sawcuengh Cwzsi》, Vujsenh Yen Gyauyuz Caeuq Gohgi Giz 6 nyied 21 hauh banhaet youq Dungzlingj Cin gawjhengz 2013 nienz Cuengh Gun song vah saw siujyoz Sawcuengh bizyez suijbingz cwzsi. Bineix Vujsenh Yen daengx yienh gungh miz 172 vunz camgya Sawcuengh bizyez cwzsi. Hong gaij gienj dangngoenz guh ndei, youz Vujsenh Yen Sawcuengh Hagdangz fucwz cujciz.

Vujsenh cij Sinhlungz Siujyoz aen siujyoz ndeu hai goq Sawcuengh. Sinhlungz Siujyoz youz Sinhlungz Cunghsinhyau caeuq Dadungz、Yinzhan、Liengzdenz sam aen diemj gyoeb baenz. Yenzlaiz cij cunghsinhyau hwnj Sawcuengh, lingh sam aen diemj haenx cungj caengz hwnj goq Sawcuengh gvaq. 2012 nienz 9 nyied, gwnz mbanj sam aen diemj cungj gyoeb haeuj cunghsinhyau daeuj le, cij hainduj bouj hwnj goq Sawcuengh.

Bineix Sinhlungz Siujyoz bizyez hagseng ndawde miz dingz he bi’gvaq ngamq bouj hwnj Sawcuengh, giekdaej mbouj ndei. Hoeng, daihgya cungj mbouj sij ndaej saetbae hwnj yienh minzcungh ban Sawcuengh aen gihvei neix, cungj bouj hag Sawcuengh. Ginggvaq roengzrengz ganj son bouj hag, baezneix gauj ndaej lij haemq ndei: Faen bingzyaenz 75.43 faen, habgeklwd 83.72%, youhsiuliz 45.93%, miz 5 boux ndaej faen ceiq sang, ndaej 97 faen.

(Ganh Sozvwnz Luz Mingzdiz Cinz Sansiu)